Geiler von Kaysersberg, Johannes - Trostspiegel - Noli flere/ Nit weyn.
SPrach Christus Jesus vnser lieber Herr zu der trawrigen Witwen die jhren einigen gestorbnen Sohn beweinet/ gab vns der Herr darinn ein lehr/ dz wir nit vnbescheidenlich beweinen sollen vnsere freund/ so sie sterben wie nahe sie vnns verwandt sind/ als etliche menschen zu thun pflegen/ die sich nicht wöllen lassen trösten/ in keinerley weiß/ weder mit Gott noch mit der Welt.
Nun sprichst du/ wie möcht ich mich enthalten/ dz ich nit beweinte den Tpdt meines kindes/ oder eines anderen meines freundes? Das ist doch natürlich/ vnd der Herr hat selbs beweint den Todt seines besondern freunds Lazari/ als das Euangelium innhaltet/ deßgleichen lesen wir von vil heiligen im newen vnd alten Testament/ die vber die todten geweint haben/ als Sanctus Hieronymus schreibt zu der heiligen Witwen Paula von dem todt jhrer Tochter Blesilla.
Ich antwort zum ersten/ das Christus vnser Herr nit beweinet hat den todt Lazari/ aber das er jn solt wider aufferwecken/ zu disem ellenden vnseligen leben/ ich sprich darnach das es nicht natürlich ist/ vnbescheidenlich weinen/ aber bescheidenlich weinen/ vnnd das zimpt sich/ als hernach berürt wirt/ sol sich ein mensch hüten/ vor zu vil vnd vnuernünfftigem weinen.
Nun sprichst du/ vnd wie möcht ich mich behüten/ vor solchem vnbescheidnen weinen/ woran sol ich trost vnd ergetzligkeit suchen.
Du solt ergetzligkeit suchen/ durch ansehung diß nachuolgenden trostspiegels/ gemacht vnnd zusammen gesetzt/ von neun glesern/ wenn du die augen deines warnemmens fleissigklich darinn spieglest in dem Sonnenglast/ oder liecht des glaubens/ mag nit gesein/ du wurdest ein librung davon entpfinden/ Schreiber/ Goldschmid/ vnd ander werckleut/ die ihr augen auff scharpife ding richten/ müssen haben vor jhnen spiegel stehn/ darinn sie ihre gesicht wider bringen vnd ergetzen/ also solt du auch thun/ ist diser spiegel genommen auß der Heiligen Geschrifft/ vnnd den heiligen Lehreren.