Zwick, Johannes - Das vaterunser in Gebetsform ausgelegt

Zwick, Johannes - Das vaterunser in Gebetsform ausgelegt

uolgend die gebätt vff das vatter vnser.

unser vatter der du bist im himmel.
Ach vnser vatter im himmel/ wir ruffend dich allein an/ vnsern einigen vatter/ zu dem wir vns vil liebe vnd guts versähend/ der du vns erhören magst/ so du wilt: vnd der du vns erhören wilt/ so wir dich vß hertzen vnd warheit darumb bittend.

Geheiliget werde din Name.
Wir bittend dich vmb gnad/ wie der name diner liebe vnd barmhertzigkeit allein heilig ist/ das Er ouch also von vnns allein geheiliget werd/ in all vnserm thun vnd lassen/ vnd wir vff den selbigen allein vnnd einig vertruwind/ durch tod vnd läben.

Din rych das kumm.
Ach vnser vatter im himmel/ wie ist das rych diser wält/ so ein vnsäligs böß rych. Zur rechten syten/ ists nichts dann falscher gloub/ falsche hoffnung/ falscher gottsdienst/ falsche leer/ vnnd aller falsch. Zur lincken/ ist nichts dann hochmut/ gyrigkeit/ lestrung/ böß lust/ üppig fröud/ nyd vnd hass/ alle boßheit vnd alles falsch läben.
Erlöß vns gütiger Gott/ von dem vngöttlichen rych/ Aber das rych dines heiligen geists/ vnd dines suns Jesu Christi/ das laß vns zukummen/ damit wir also rych werding im glouben/ in Gottes forcht vnd liebe/ wandlind also schlächt vnd gerächt hie imm zyt/ das vns ouch also nach disem zyt zukumme das ewig rych/ Amen.

Din will der gschäch vff erden wie imm himmel.
Ach vnser vatter imm himmel/ wie hand wir alle so ein bösen willen/ zu allem das gut ist/ vnd sind so fry willig gegen allem das böß ist. Wie nemmend wir ouch alle ding so für übel vf/ was du redest/ thust/ oder gegen vns handlest. Gib vns gütiger Gott/ einen sterckeren willen wider die sünd/ vnd einen bessern zu allen tugenden/ vnnd das wir in allem zytlichem lyden/ din vätterlichen willen erkennind/ vnnd darnach läbind/ wie alle Engel vnd heiligen imm himmel darnach läbend/ Amen.

unser täglich brot gib vnd hüt.
Ach vnser vatter imm himmel/ behüt vns vor übriger sorg der narung/ sonderlich aber vor der gytigkeit/ damit wir nit vom glouben irrs gangind. Beüt vnns aber ouch vorm bättel vnnd hungers not. Gib vns äben vnser täglich brot. vil mer aber wellest vnns all tag spysen an vnsern armen seelen/ mit dinen heiligen wortenn vnd wercken/ voruß mit den gnaden dines heiligen geists/ in vnsern hertzen vnd läben. Gütiger Gott/ erhalt vnd erneer du vns also täglich/ an lyb vnd seel/ Amen.

und vergib vns vnser schuld/ als wir ouch vergebend vnsern schuldigern.
Ach vnser vatter/ wie hand wir alle so vil frömmder vnd eigner schuld. O gerechter Gott/ wie ist vnser hertz vnnd läben so vngerecht/ wie redend wir so übel/ wie thund wir so übel/ wie ist es doch alles so grosse schuld/ was in vns vnnd an vns. O wie machend wir on vnderlaß ein schuld vff die andern. Gütiger Gott/ verzych vns aber all vnser grosse sünd vnd schuld. vnd diewyl du vns verzyhen wilt/ wie wir verzyhend/ so gib vns ewiger Gott/ hertz vnd willen/ das wir solchs thynd/ vnd vns in der liebe gegen allen vnsern fynden erzeiging/ wie du dich gegen vns dinen tödtlichen fynden/ in rechter lieb erzeigt hast. vnd sye dir lob gütiger Gott/ für alle menschen/ die solchs thund/ vnnd erbarme dich über alles nydisch/ zornig/ vnfridlich vnd liebloß läben/ Amen.

und für vns nit in versuchung.
Ach vnser vatter im himmel/ du weist wie schwach das fleisch ist/ wie die welt so böß/ wie der tüfel so listig/ wie die sünd so gwaltig/ wie armut vnd kranckheit so schwär/ wie vns die fynd so böse wort gebend/ vnd die fründ so gute/ vnd voruß/ wie lyden so vnlydenlich ist. Darumb so gib vns gnad allmächtiger Gott/ das wir durch kein falsche versuchung/ von dinem heiligen wort/ von dem rehcten glouben/ vnnd von eim rechten glöubigen läben abfallind: sunder das wir dich für alles vff erden förchtind vnd liebind/ voruß/ das wir an diner gnad vnd barmhertzigkeit nümmermee verzwyflind/ Amen.

Sunder erlöß vns vom bösen.
Ach vnser vatter im himmel/ Diewyl so vil böser ding sind/ die man für gut ansicht/ vnd man vil falschen dingen ein warhafften namen geben kan/ geschwygen das wir offt/ das offenlich böß ist/ mit flyß vßerwellend für das gut. So erlöß vns/ du gütiger Gott/ von allem das böß ist/ erlöß vns von allem vnglouben/ erlöß vnns von allem vnglöubigem läben/ erlöß vnns von allem das wider dich oder vnsern nächsten ist/ erlöß vns hie imm zyt von aller sünd/ vnnd nach disem zyt von der ewigen verdamnuß. Behüt vnnd bschirm vnns ach lieber vatter/ vorm tüfel/ dem aller bösesten/ vnd vor all sinem anhang/ Ame.

Beschluß
Deß vnnd alles andern/ so dinem heiligen Namen loblich/ vnnd vns an lyb vnd seel not ist/ welliust vns yetz vnd allzyt gnädigklich erhören/ in dem nammen dines einigen gebornen suns/ vnsers Herren Jesu Christi/ in deß fleisch du dich allmächtiger Gott/ mit aller diner trüw/ liebe/ gnad vnd barmhertzigkeit/ als ein vatter/ warhafftigklich erzeigt hast/ vnd das allen menschen vff dem gantzenn erdtrych/ zu verzyhung jrer sünd/ die das in der warheit gloubend. vnd O vatter imm himmel/ gib vnns den warhafftigen glouben in vnsere Hertzen/ vnnd mach vns dadurch zu dinen warhafftigen kinden/ das wir all tag vfwachsind vnd zunemmind in diner göttlichen liebe/ vnd in der gerechtigkeyt Jesu Christi/ wandlind also alle tag/ vnser läbenlang/ wie frummen gottsförchtigen/ liebrychen vnd glöubigen kindern Gottes wol anstadt.

Allmächtiger vnd barmhertziger Gott/ gib das diß allssammen geschäch vnd waar werd.

Amen.

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/z/zwick/zwick-vater_unser_gebetsform.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain