Melanchthon, Philipp - Gebet / darinne man die Artickel des Christlichen glaubens betrachtet / nemlich wo sich Gott geoffenbaret hat / wie er wil erkandt werden / Und warumb er uns erhören wil.
Allmechtiger / lebendiger / warhafftiger ewiger Vater unsers Heyland Jhesu Christi / sampt deinen eingebornen Son Jesu Christo und heiligen Geiste. Erschaffer himels und der erden / der menschen und aller creaturen / der du bist weiß / gerecht / gütig / warhafftig / keusch / richter und barmherzig / und gesprochen hast / So war ich lebe / Ich wil nicht das der sünder sterbe / sondern das er bekeret werde und lebe / Ich ruffe dich an / und bitte dich / Erbarme dich mein / und vergib mir alle meine sünde / sey mir genedig / und mache mich gerecht / umb deines lieben Sons Jhesu Christi willen / und durch jhn / welchen du zum mittler / versüner / erlöser / und uns zur gerechtigkeit mit wunderbarlicher gütigkeit / und weißheit geordenet hast / und mache meine seele und herz rein und heilig mit deinem heiligen Geiste. Lehre unnd regiere mich / und gib mir ein ewige seligkeit / du wollest auch für und für allezeit / dir eine ewige rechte kirchen unter uns samlen / Christliche und selige regiment schutz und das tegliche brodt geben / und die grimmigen teuffel von uns wegtreiben / auff das sie nicht sünde / lesterung und zerstörung anrichten / Sonder wollest uns erhalten / das wir dich recht anruffen / und dir in ewigkeit dancken und dich preisen / Amen.
Ich gleube auch / das du mich warhafftiglich umb deines sons Jhesu Christi willen erhörest / und das dieses gebet umb seiner willen krefftig sey / denn dein lieber Sohn Jhesus Christus ist der hohepriester / der selbest für uns bittet / und unser seuffzen zu dir fürbringet / und diesen meinen schwachen glauben / und schwache anruffung wollestu gnediglich durch deinen heiligen Geist stercken / Amen.
Gebet zu dem sohn Gottes unserm HErren und hohenpriester.
O Allmechtiger Herr Jhesu Christe / ewiger Gottes Sohn und ebenbildt des ewigen vaters / der du für uns gecreutziget bist / und bist widerumb vom tode aufferstanden / und lebest und regierest ewiglich in Götlicher krafft und bist geordnet zum mitler / und zuversünen / gerecht und selig zu machen / Ich bitte dich mit herzlichem seuffzen / erbarme dich mein / vergibe mir meine sünde / und bitte für mich den ewigen Vater / und wollest in mir sein / und durch deinen heiligen Geist / ein newes liecht / reinigkeit / und seligkeit in mir wircken / Wollest auch für und für / dir ein ewige kirche unter uns samlen / und selige regiment geben / das wir dir in ewigkeit mit frölichem herzen dancken und dich preisen Amen.
Gebet zu Gott dem heiligen Geist / welcher uns heiliget und regiret.
O Allmechtiger Gott heiliger Geist / der du dich geoffenbaret hast / da du in die Aposteln sichtbarlich gesandt bist / und welchen der Sohn Gottes uns verheischen hat / du wollest dich unser erbarmen / und umb des heylandes Jhesu Christi willen / in uns rechte erkendtniß und anruffung der Göttlichen Mayestet / des ewigen vaters / Und des Sohns JHEsu Christi / sampt dir anzünden / wollest uns nicht inn verfürung / unnd auff Irrthumb / fallen lassen / wollest unser herzen rein unnd heilig machen / Gottes furcht / rechten trost / glauben / hoffnung / liebe gegen dir in uns erwecken / Wollest die kirchen Gottes für und für erhalten / und mit rechter lehre / gutem rath / und einigkeit regieren / Wollest auch in der weltlichen regierung / guten radt / frieden / und seligen standt geben / das wir der Göttlichen mayestet dem ewigen vater und dem Sohne Jhesu Christo / sampt dir in ewigkeit mit frölichem herzen / danck und lob sagen Amen.
Quelle: Winsheim, Valentin - Betbüchlin des tewren seligen mannes Herren Philippi Melanthonis