Ich glaub eine heylige Christliche kirch/ in welcher auff erden vil heuchler sein.

Das hymelreych ist gleych einem menschen/ der guten samen auff seinen Acker seet. Da aber die leut schlieffen/ kam sein feind/ vnnd seet vnkraut zwischen den Weytzen/ vnnd gieng dauon. Da nun das krautwuchs/ vnnd frucht bracht/ da fand sich auch das vnkraut. Da tratten die Knecht zu dem Haußvatter/ vnnd sprachen: Herr/ hast du nicht guten samen auff deinen Acker geseet? woher hat er denn das vnkraut? Er sprach zu jn: Das hat der feind gethon. Da sprachen die knechte: Wilt du denn das wir hingehen/ vnd es außgetten? Er sprach: Nein/ Auff das jhr nicht zu gleych den Weytzen mit außrauffet/ so ihr das vnkraut außgettet/ Lassets beyde mi9t einander wachsen/ biß zu der erndte. Vnnd vmb der erndte zeyt/ wil ich zu den Schnittern sagen: Samlet zuuor das vnkraut/ vnd bindet es inn bündlein/ das man es verbrenne. Aber den Weytzen samlet mir in meine Scheuren.

Sage mir die gleychnus vom vnkraut mit jrer außlegung?

DIe welt ist der Acker Gottes/ darauff seet der Herr Christus einen guten samen/ die kinder des Reichs die liebe Christenheyt. Der Sathan seet sein vnkraut/ dorn vnnd distel drunder/ das sind die bösen kinder vnd heuchler/ die sich vnter die Christen mengen/ wie Meuse mist oder gebeluhe vntern pfeffer. Am ende der welt wirdt der schnit angehen/ da werden die Engel vnd Prediger Gottes/ die Christen durchs wort auffsamlen in Gottes schewre/ vnnd die Gottlosen durchs Gessetze vnd in krafft der schlussel auß dem Acker Gottes werffen/ vnd in den ewigen fewerofen verbannen.

Was sollen wir auß disem gleychnus lernen?

Ob wol der vnrhuige vnnd böse Geyst nicht feyret/ vnnd vberstrewet die felder Gottes mit erglichen leuten/ vnd zuwület die Kirchen/ wie ein andere saw/ Dennoch wil Gott einen heiligen samen allezyt inn seiner kirchen erhalten/ biß an der welt ende/ Esai. 6. Wie er in der Sündflut Noah vnd seine zwen Söne erhielte/ Vnnd zu Elie zeyten 7000. haußwirte/ vnnd vor Christi geburt Zachariam vnnd Simeonem.

Zum andern/ weyl wir hören/ das der Sathan vnmüssig ist/ vnddencket die kirche Gottes vmbzukeren/ sollen wir nicht schlaffen vnd schlummern wie die tollen Junckfrawen Matth. 26. Oder wie die bösen haußhalter/ sondern sollen wachen vnd sorgfeltig sein/ vnd der herde vnd ackers Christi/ als trewe diener fleissig warten/ vnd teglich pflantzen/ begiessen/ geten/ reutern/ zeunen vnd weren 1. Corinth. 3. vnd Gott vmb das gedeyen bitten.

Vnd so wir das vnkraut durch die predigt gestraffet/ vnd offentliche sünder in krafft der schlüssel gebannet haben/ sollen wir prediger nit das schwert wider die vnchristen zucken/ vnd sie selber außrotten wöllen/ wie die Widertauffer theten/ sonder der ordentlichen rach vnnd jüngsten gericht Gottes befelhen/ Der wirt den trepsen vnd tolgret/ vnd alles was die gewissen jrret vnnd verwirret/ zu seiner zeyt wissen außzurotten/ Wie er solches an Bileam Hophni vnd Pniehas 1. Samu. 3. vnd an Chreintho vnd Arrio/ vnnd zu vnsern zeiten an vilen ketzern/ mit grewlischer straff beweiset hat.

Woran kennet man ein Heuchler vnnd falschen Christen?

Ein Maulchristen/ der nur mit in der zal ist/ vnd füret den Christen namen/ vnd lebet bey jnen in eusserlicher gemeinschafft der Sacramenten/ doch one rewe/ glauben/ vnnd gutem vorsatze/ der ist am leibe Christi wie ein wasserreben am weynstock Johan.. 15. vnd wie trepsen vnd ratten vnter dem getreyde/ vnd wie sprew vnd hülsen auff der tennen/ Psal. 1. vnd wie ein faul geliedmaß an einem gesunden leibe 1. Cor. 12. Ein solcher heuchler bringet nimmermehr gute früchte/ Johan. 15. vnd bleibet nit bey den rechten körnern Christi/ sonder zusteubet vnd zufleugt vom wind/ wie andere sprew/ vnd gibt kein mehl/ darauß man danekopffer vnnd schaubrot backen könne/ vnd sauget vnd wuchert die andern glidmaß auß/ vnd beschweret ander leute/ vnd macht das der gantze leib Christi seines stanks halber gelestert wirdt/ wie ein ander ölschenckel.

Darumb wil Christus die vnfruchtbarn reben abhawen/ vnd die klafft vnd disteln inn das hellische fewer samlen/ vnd die faulen glidmaß abstossen/ vnd in die eusserste finsternuß werffen lassen/ wie den/ der kein hochzeytkleyd anhatte/ MAtth. 22.