Ich glaub eine Christliche kirch/ welche alle pforten der hellen nicht vberweltigen werden.4

JEsus trat in ein Schiff/ vnd seine Jünger volgeten ihm. Vnnd sihe/ da erhub sich ein groß vngestüme im Meer/ also/ das auch das Schifflein mit wellen bedecket ward/ vnd er schlieff. Vnd die Jünger tratten zu jm/ vnd wecketen jn auff/ vnd sprachen: Herr/ hilff vns/ wir verderben. Da sagt er zu jn: Jr kleinglaubigen/ warumb seydt jhr so forchtsam? Vnd stund auff/ vnnd bedrowete den Wind vnnd das Meer/ Da ward es gantz still. Die Menschen aber verwunderten sich/ vnd sprachen: Was ist das für ein Mann/ das ihm Wind vnd Meer gehorsam ist?

Waruon lautet diß Euangelion?

DEr Herre Christus feret mit seinen Jüngern vber See/ weyl er aber schlefft im schifflein/ erhebt sich ein windprauß/ das die wellen das Schifflein bedecken/ das es sincken vnd vntergehen wil/ Als bald jn aber seine Jünger anschreyen vnnd auffwecken/ schilt er die winde vnd das mehr/ vnd machet ein grosse stille.

Was bedeutet diß Schifflein?

Es ist die liebe Christenheyt/ darauff Christus mit seiner gemeine feret durch die vngestümme welt/ Weyl aber der Herr in schwachheyt regieret/ vnd stellet sich als schlieff er/ so erregen sich alle pforten der Hellen wider jn vnnd seine Kirchen/ das es sich alle augenblick ansehen lest/ als werde die kirche sincken vnd vntergehen. Weyl aber der Sone Gottes mit vns im Schifflein ist/ vnd schlummert vnd schleffet nicht/ vnd wir fliehen in nöten zu jhm/ als zu einem festen ancker/ vnd ruffen jn an/ so wil er vns inn der geferligkeyt nicht lassen/ vnnd mitten in grossen wassern bey vns sein/ vnnd bleiben/ das vns die wasserstrame vnnd wolckenprüche nit sollen erseuffen/ Esaie 43. Vnd wil vns auffs drucken helffen/ vnd solt auch das schiff zu trümmern gehen/ wie Sanct Pauli schiff/ Acto. 27.

Was sol die elende Christenheyt hierauß lernen?

Sie solle gewißlich glauben/ das sie des ewigen Sons Gottes hertzliche Braut ist/ Johannis am 3. daran er allzeit seinen lust vnnd gefallen hat/ Psalmo am 16. Vnnd seine liebe Hephziba vnd schöne krone/ Esaie am 62. die er als lieb hat/ als sein eigene seele/ Hieremie am 12. Dieweyl er sie mit seinem thewern blut erkaufft hat/ Actorum am 20. Vnd sol des gewiß sein/ das er sie nicht lassen/ sondern in jr wonen vnnd bleiben wil/ biß an der Welt ende/ vnd sie von allen feinden vnnd vnglück erretten/ da auch die Welt voller Teuffel vnd Tyrannen stecket/ wütet vnnd tobet/ sauset vnnd brauset/ wie das vngestüme Meere/ Psalmo 46. Denn er frewet sich seiner gemeine/ Wie ein Breutigam vber seiner Braut/ vnnd hat sie gegründet vnnd erbawet auff einen starcken felß/ Matth. am 16. vnd füret sie in seiner hand/ wie den kasten Noah/ vnd kan den winden vnd meere gebieten/ das sie sich legen müssen vnd stille sein. Wie er seinen gewaltigen arm an Pharao/ Exodi am 14. Vnnd Sennacherib 2. Reg. 19. Vnd an allen Tyrannen beweyst hat/ die jhm sein volck vnd Stat haben verstören vnnd außrotten wöllen.

Sage mir etliche trostsprüche.

Luce 12. Förchte dich nicht du kleines herdlein/ denn es ist ewers Vatters wolgefallen/ euch das reych zu geben. Esaie am 46. Spricht Gottes Son zu seiner Kirchen: Höret jr Christen/ die ich inn meinem leybe trage/ vnnd die ihr mir inn der Mutter liget/ Ich will euch tragen biß ins alter/ vnnd biß ihr graw werdet/ vnnd will euch erretten. Esaie am 49. Zion die gemeine Gottes spricht/ Der Herr hat mich verlassen/ der Herr hat mein vergessen/ Kan auch ein Weyb jres kindleins vergessen/ das sie sich nicht erbarme vber den Son jres leibes? vnd ob sie des selbigen vergesse/ so wil ich doch dein nicht vergessen/ sihe in die hende habe ich dich gezeichnet.

Esaie am 54. ICh hab dich einen kleinen augenblick verlassen/ aber mit grosser barmhertzigkeyt will ich dich samlen/ Ich hab mein angesicht im augenblick des zorns ein wenig vor dir verborgen/ aber mit ewiger gnade/ wil ich mich dein erbarmen/ spricht der Herr dein erlöser.