Du solt Vater vnd Mutter ehren.

Vnd seine Eltern giengen alle Jar gen Jerusalem/ auff das Osterfest. Vnnd da er zwölff Jar als war/ giengen sie hinauff gen Jerusalem/ nach gewonheyt des Festes. Vnd da die tage volendet waren/ vnnd sie wider zu hause giengen/ bleyb das kind Jesus zu Jerusalem/ vnnd seine Eltern wustens nicht/ sie meineten aber/ er were vnter den geferten/ vnnd kamen ein tagreyse/ vnd suchten jn vnter den gefreundten vnd bekandten.

Vnd da sie jn nicht funden/ giengen sie widerumb gen Jerusalem/ vnd suchten ihn. Vnnd es begab sich nach dreyen tagen/ funden sie ihn im Tempel sitzen/ mitten vnter den Lerern/ das er ihn zuhörete/ vnnd sie fragete. Vnd alle die ihm zuhöreten/ verwunderten sich seines verstands/ vnd seiner antwort.

Vnd da sie jn sahen/ entsatzten sie sich/ vnnd sein Mutter sprach zu ihm: Mein Son/ warumb hast du vns das gethon? Sihe/ dein Vater vnd ich/ haben dich mit schmertzen gesucht. Vnd er sprach zu jnen: Was ists/ das jr mich gesucht habt? Wisset jhr nicht/ das ich sein muß/ in dem das meines Vatters ist? Vnd sie verstunden das wort nit/ das er mit jn redet. Vnnd er gieng mit jn hinab/ vnd kam gen Nazareth/ vnd war jn vnterthan. Vnd sein Mutter behielt alle dise wort inn jrem hertzen. Vnnd Jhesus nam zu/ an weyßheut/ alter/ vnd gnade/ bey Gott vnnd den menschen.

Was stehet in disem Euangelio?

DEr heylige Geyst beschreibet der eltern Christi fleyß vnd sorge/ gegen dem kindlein Jesu/ vnd wie es seine Göttliche vnnd wunderbare weißheyt im zwölfften iar hat sehen vnnd hören lassen/ inn kindlichem gehorsam gegen seinen eltern.

Wie erzeucht die werde Mutter jr liebes Jesulein?

Sie pfleget ssein wol/ vnd beweyst jm Mütterliche trewe/ vnnd nimpt es mit zu Kirchen im 12. Jare/ so ein fernen wege/ vnd helt es zu Gottes wort/ vnd gewehnet es zur arbeyt/ vnd sorget hertzlich für es jr lebenlang.

Sage mir die Historien/ von des Herrn Christi Kindtheyt?

Wie er zu Bethlehem geborn/ vnd am 40. tage hernach inn Tempel gebracht wirdt/ muß er in Egypten fliehen/ dieweyl jhm Herodes nachstellet/ Bald aber nach des Tyrannen tode/ kumbt er gen Nazareth/ da gehet er mit seinen Eltern zu Kirchen vnd höret die predigt mit allem fleyß/ vnnd fraget nach der heiligen Schrifft/ vnd hilfft seines hymlischen Vatters ehre fürdern. Im hause ist er seiner Mutter gehorsam/ vnd liset spene auff/ vnd gehet in knechtes gestalt/ vnd wirt ein Zimmerman vnnd burger zu Capernaum/ vnd hilfft seine mutter ernehren/ welche er am heyligen Creutz seinem lieben jünger Johanni befilcht.

Was sollen wir auß disem Euangelio lernen?

Die Eltern sollen ihre kinderlein Christo zubringen/ inn der heyligen Tauffe/ vnnd darnach sie vnterrichten im heyligen Catechismo/ vnnd mit sich zu kirchen füren/ vnd mit Gottes wort (Psalm. 119.) zimlicher straffe vnd gutem Exempel zur Gottseligkeyt/ ehrlichen künsten/ oder arbeyt/ vnnd zu tugent gewehnen/ vnd für sie Vetterlich sorgen/ vnnd hertzlich beten/ damit sie jre Kinder in zucht vnnd vermanung des Herren auffziehen/ vnd mit sich für das angesicht Gottes bringen/ als den höchsten vnd besten schatz/ welchen jnen Gott vertrawet hat. Denn vnser Herre Gott gibet seinen segen darzu/ wenn die Eltern jre kinder in der forcht Gottes erziehen/ das sie ehre vnd freude an jhnen erleben/ Wie Jacob an seinem Sone Joseph/ Wenn sich aber die Eltern der kinder nicht annemen/ leren vnnd straffen sie nicht/ so wil Gott Eltern vnd kinder schwerlich heimsuchen/ wie er solches im Priester Heli dem nachlessigen kinder Vatter/ vnd seinen vngehorsamen kindern beweyst hat/ 2. Samuelis. 3.

Was sollen die Kinder hierauß lernen?

Sie sollen sich dises heyligen kindleins vnd seines wortes in allen nöten hertzlich trösten lernen/ vnnd seinem Exempel jhr lebenlang volgen/ gerne betten/ Gott dancken/ zur predigt gehen/ die Kirchendiener inn ehren halten/ jren Eltern vnd Schulmeystern im Herren gehorsam sein/ vnnd sie inn jrem alter ernehren vnd versorgen helffen/ vnnd sollen gerne studieren oder arbeytten/ yederman dienen/ willig/ züchtig/ trew/ warhafftig/ redlich vnd verschwigen sein/ So werden sie gunst vnnd gnade bey Gott vnnd dem menschen finden/ langes leben/ glück vnnd fürderung auff erden haben/ Wie der fromme Son Joseph/ vnd das arme waißlein die Esther/ welche Gott zu einer Königin machte.