Hedio, Caspar - Ablenung/ kurtz/ nutzlich vnd nottwendig

Hedio, Caspar - Ablenung/ kurtz/ nutzlich vnd nottwendig

vff B. Cunrats Tregers Büchlin/ durch D. Casparn Hedion/ Predicanten der hohen stifft Straßburg begriffen.

Anno xxiiii. des monats Octobris.

An die begnadeten der Christlichen Statt Straszburg.

Geliebten Gottes. Ich were wol willens gewesen/ gar nit zu antworten vff B. Conradts Tregers büchlin/ darinn er mich/ mit sampt anderen meinen lieben brüderen antastet gar grewlich. Dann wie man sagt/ Ein offentliche luge/ bedarff nit vil verantworttens. Dieweil aber vß dem gebott gotts/ ein yeder schuldig ist/ falsche zeügn üß zumeiden vnnd zu verwerffen/ vorab in denen dingen so die eer gotts berüren. dar zu auch die liebe (so war nimpt anderer menschen heyl) dahyn tringt vnd treibt/ dz die einfeltigen verwarnet werden/ vor denen/ die vmb irer träum willen sich vndersteen die wort des lebendigen Gotts vmb zu hören. Hab ich meiner einfalt nach/ diß mein schreiben lassen vßgon/ mein vnschuldt eüch vnd aller welt zu öffnen. Dann so bald mich gott beruffet hat zu bezeügen das Euangelion der gnaden/ hab ich ye mit wissen nyemans verfürt/ so ich den weg/ die warheit/ vnd das leben geleret habe. des ir mir zeügnüß geben werden in der zukunfft der glory des grossen gotts/ vnd in der offenbarung seiner kinder. So ich die geschrifft schrifftlich/ nach dem synn den der geist gots gibt (der ein geist der weißheit ist/ vnnd des verstandts) gehandelt vnd gepredigt hab/ warumb sol ich ein falscher prophet/ oder verfürer geachtet werden? Das hertz der gerechten hab ich mit lugen nye wöllen traurig machen/ hab auch die hend der gottlosen nit wöllen traurig machen/ hab auch die hend der gottlosen nit wöllen stercken mit süßkosen vnd schmeychelworten. Soll ob gott wil/ noch/ vnd zu allen zeitten weit von mir sein. Es ist aber die sach/ leider dohyn kommen viler halb (Gott der vatter wölle sye auch zyehen) was ire vntugent straffet/ der Pfaffen/ Münch vnd selloßen Christen geytz allenfantz/ falsch ler/ gleyßnerey/ vnd vngöttlich leben herfür bringt/ so sye mit den laruen einer verwänten geistlicheit bedeckt haben lange zeit/ das musß Lutherisch/ Böhemisch vnd verfürisch sein. Dahär dann die gantz Bibel yetzund Lutherisch/ Böhemisch/ vffrürisch/ vnnd ketzerisch von ynen erachtet würt. Wie sol man ym nun thun? Es würt das wort gots nit destweniger in ewigkeit bleiben/ vnnd das euangelionn ab irem schelten/ fluchen vnd vermaledeyen wachßen vnd zunemen bitz das gott erlösung schicken würt. Amen.

Hab in einer klaren kürtze/ etliich Schlusßreden gesetzt/ in denen Bruder Conradts schreiben/ der fürnemsten puncten halb/ meins bedünckens/ gnugsam vnnd nach Christlicher bescheidenheit verantwort. Welche gelegener zeit/ mit iren vßlegen/ durch den truck auch herfür komen sollen/ ob gott wil/ mit weitterer meldung seiner vnfrüntlichen/ vngegründten vnd vnbrüderlicher handlung. Ir liebhaber der warheit wöllens leßen/ hören/ verston vnd vrteilen.

Die erst Schlusßred.

  1. Vor allen dingen/ sol man die geschrifft frey lassen/ vnd vngeschmächt.
  2. Die Biblische meyne ich/ von Gott yngegeben/ ie nütz ist zur leer/ zur straff/ zur besserung/ zur züchtigung in der gerechtigkeit.
  3. Dannen här wir lernen/ was Christus ist/ warumb er gegeben/ wie er verheyssen/ vnd wie all geschrifft von ym. Auch was gehorsame wir gott vnd den menschen schuldig.
  4. Darumb sich niemant zu beklagen hat einicher verdunckelung. dieweil nüt hellers dann die sonn/ das ist/ die geschrifft/ vnd der eingeboren sun/ der in des vatters schoß ist/ hat es vns verkündiget.
  5. Ob aber ein wolck dafür getretten (das ist/ so ein tunckel spruch erfunden) so bleib man bey dem lyecht. oder man erleüters durch neben geschrifft.
  6. Diß ist bey den alten gewesen/ vnd sol auch bey vns sein die allersicherst vnd vnfälbar form/ götlich geschrifft zu verston.
  7. Lasßt man den Mahumetern ir gesätz/ den Benedictern/ Bernardern vnd Bettelmünchen/ einer vnnützen bürden des erdtrichs/ ire reglen halten vnd leben/ so doch on allen grund.
  8. Wer wil billichen/ so man die kinder gots/ von vätterlichen satzungen abreisset.
  9. Man sagt/ es seyen gefärliche zeitten/ da alle ding durch zwytracht vnd vneynigkeit bewegt ist.
  10. Da sich ketzereyen erheben/ vnd die luterkeit des glaubens vermischet/ vnd alle ding voller entbörung.
  11. Aber so wir zu der rug/ einem seligen ding/ hertzen lust haben/ sollen wir die geschrifft hören/ verston vnd lesen. würt vns geholffen.
  12. Dann on das rechtmessig wort gotts/ beharrlichenn woren friden zu haben/ versehe sich nyemans.
  13. Das aber solches beschehe/ ist die gröst hoffnung in den Schulmeistern/ Predicanten/ vnd pfarrhern.
  14. So man hyn vnnd här die stedt vnnd flecken besetzt/ mit solchen wie sye Paulus beschreibt .i. Timoth. in .Titum.i.
  15. Die dann recht lerhafftig seind/ wo sye der sprach verständig/ die geschrifft gesund vnd grundtlich handlen.
  16. Dieweil nun das gesatz des herren on wandel ist/ die seien erquickend/ kan dahär kein abbruch erwachsen der gewalt vnd potestat/ von gots gnediger ordnung vffgesatzt.
  17. Genesis. ix. Exodi. xviii. Deutro. xvii. Prouer. xvi. Ro. xiii. würt besteiget weltliche höhe/ so das schwert nit vmb sunst tregt.
  18. Damit sye aber nit straffet die Christen/ sunder mörder/ dieb/ übelthäter/ oder frembds guts süchtig.
  19. Der gleichen auch kein abbruch erwechset geistlichem gewalt/ so er ist das er genant würt.
  20. Dann so sye sytzen vff dem stul Christi/ vnd verkündigen das reich gotts/ sol man sye als Engel gotts gern hören/ auch die augen jnen mitteylen.
  21. Wo sye aber wider die geschrifft etwas sagten/ sich ires gewalt mißbruchten/ der nit mehr dann ein dyenstbarkeit/ sol man sye als ein Anathema vnd fluch meiden.
  22. In summa. Dieweil Christus alle seine red mit gschrift bestetigt/ der gleichen seine nachfolger die Aposteln vnnd Euangelisten/ sol nyemans suchen ein sattere red/ dann do ist die Biblisch.
  23. Welcher so wir standhafft/ vnd mit grossem vertruwen anhangen/ so ist gott vnser herre/ vnd wir seind sein volck.
  24. Vnd diß volck/ mit dem geyst Christi (der gestern/ vnd heütt/ vnd in ewigkeit) zu samen geleimpt/ ist die Kirch/ das ist/ die zal der gleübigen.
  25. So du fragst/ wo ist die kirch? Antwort. Dieweil mans glaubt/ so mag sye nit gezeygt werden. Auch ist got allein der die hertzen erkennet/ der do weyßt/ wer die seind so rüffen/Abba lieber vatter.
  26. Von dißer kirchen seind die frumen heyligen/ oder seligen beyder Testament/ des alten/ vnd des neüwen.
  27. Dann alle diße geglaubt haben/ oder glauben/ das der som des weibs solt dem schlangen den kopff zerknitschen. Gen. iii. xxii. Heb. xi.
  28. In dißer kirchen ist alweg das Euangeion/ so do ist ein krafft gots zum heyl allen gläubigen.
  29. Vnnd das ist ein einig Euangelion. dann ein will gotts ist/ der sich vnser erbarmpt hat durch Christum/ welcher gestorben ist vmb vnserer sünd willen/ vnd von wegen vnßerer rechtfertigung vom tod widerumb vfferstanden.
  30. Wiewol solche gutthat Christi in der heyligen geschrifft verheissen/ kurtz vnd lang/ zu den letsten zeitten/ durch die Apostel vnd Euangelisten beschriben ist.
  31. Den frumen in beyden Testamenten/ anfengklich ist die gnad des heyligen geists gwesen/ für die buchstaben vnd schrifften.
  32. Vnnd dann erfüllt das/ so man lyset Hier. xxxi. Ich wil geben mein gesatz in iren synn/ vnd in ir hertz wil ich es schreiben. Item Johelis. ii. Ich wil vßgyessen von meinem geist.
  33. Des haben wir Exempel im Abel/ Noah/ Abraham/ vnnd in den Aposteln.
  34. Da nun die boßheit überhand gnommen/ vnnd die liebe viler erloschen ist/ seind die buchstaben vnd geschrifften geben.
  35. Das hat bezwungen Mosen/ die propheten/ (worden die Aposteln vnnd Euangelisten zu schreiben.
  36. Ein wunderbarliche ordnung/ vnd ein einhelligkeit des schreibens/ gibt grosse beuestigung der warheit.
  37. Ja das sye schon etwan in etlichen dingen niit gleich hellen vnd nit zuvil überschenckliche sorg tragen der gleichsame/ zeygt ein götlich compositz vnd zamensatzung.
  38. Dann wiewol sye menschen gwesen/ so haben sye doch nit von menschen / sunder durch gott/ vnd die offenbarung Jhesu Christi die gesschrifft/ vnd das heylig Euangelion.
  39. Sye haben geschriben nit vß menschlichen/ vns gegeben. sundern vß götlichem gwalt/ nit ire/ sunder die worrt des lebhafftigen gots. besyhe das gantz capitel Johan. xvii.
  40. Da här man gewaltigklich schle´üßt/ das die Euangelia ir ansehen vnd authoritet nit nemen von den Vättern/ Concilien/ oder von der kirchen.
  41. Sonder von gott/ ja von ynen selber. dann das Euangelion ein gwalt gots ist.
  42. Die Vätter aber/ Concilia/ vnnd die kirch haben iren gewalt vnd ansehens/ von der geschrifft/ vom Euangelio.
  43. Augustino/ so er den freyen willen im menschen vverwürffet/ glaub ich. dann ich glaub der geschrifft.
  44. Chrysostomo/ so er verdampt die/ die ir fleisch/ dz ist/ iren neben menschen verschmähen/ Esai. lviii. glaub ich. dann ich glaub der geschrifft/ vnd dem Euangelio.
  45. Also dem Concilio Niceno/ von der gottheit Christi Jhesu/ glaub ich.
  46. Aber allen andern Concilien/ da die gotlosen bücher des Decrets vnd Decretals zugelassen vnd bestätiget/ glaub ich nit. dann ich glaub der geschrifft.
  47. Vnd kürtzlich. Das ich der kirchen (so die speiß/ die Geverbotten/ so bann fast/ apostel fast/ golt fast/ feyertag beym bann vnd einer todtsünd vffgericht/ bilgerfart/ jarzeit/ seelmessen opfermessen/ kutten/ kappen/ platten/ orden/ secten bestetigt vnd vertädigt. Item im namen christi/ vnser frawen/ sant martin/ Joanns/ sant Peter/ mit gewalt fert/ wüchert/ schyndt/ schabt/ bescheyßt/ beschetzt/ so sye solt behüten/ beschützen vnd beschirmen) nit glaub. Vrsach. ich glaub der geschrifft.
  48. Darinn solchs alles keinen grund/ oder ein geradprechten grund zuhaben/ klarlich mag beybracht werden.
  49. Vnd diß auch gar nit die herrlich/ heylig/ vnd vnstrefflich kirch/ so Christo vnderworffen ist.
  50. Auch über die masß ein grosser vnderscheyd zwischenn der heyligen kirchen/ vnd den vermeynten fürstendern der kirchen.
  51. Alweg ist hoch von nötten gwest/ der geist der erkyesung. dann nye geprosten falsch propheten/ oder widerchristen/ die den teüfel an gotts stat setzten/ vnd die lugen für gottes wort hyelten vnd ynfürten.
  52. Die geschrifft sey aber der Probierstein/ da mit wir sehen die torheit/ den eebruch/ vnd das lugenmaul des widerchrists/ vnd die falsch leer von der gutten vnderscheyden.
  53. Wie der dem Euangelion nüt gibt vnd nüt nimpt/ der Scotum/ Thomam/ Gritzs/ Gretsch/ oder der gleichenn geschrifftwürger/ vnd sophisten/ gegen dem Euangelion helt vnd conferiert.
  54. Also auch das Concilium in Nicea (da es zusamen vergleichen die/ so sich vnderwunden haben zu schreiben Luce.i. mit denen so von anfang selbs sychtig gewesen) dem Euangelio nüt gegeben/ auch nüt genummen hatt.
  55. Der die zeügnüß hatt/ so grösser ist dann die zeügnüß Johannis des teüffers/ der nimpt kein zeügnüß von dem menschen Joannis.v.
  56. Dann meine weg seind nit wie ewere weg/ noch meine gedancken wie die ewere/ sprach gott der herre.
  57. Ein yeder mensch sündt/ vnd lugenhafftig ist.
  58. Aber gott der gnedig/ erlengt vom zorn/ gemerter barmhertzigkeit vnd warhafftig.
  59. Darumb wol dem der sein hoffnung in jn setzet/ das wortt gottes hört vnd behalt/ vndd sich nit wendet zu den hochfertigen/ vnnd die mit lugen vmb gon. Aber wee der widerparthey/ so spricht/ es ist weder gott/ noch gottes wort.
Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/h/hedio/hedio_ablenung.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain