Corvinus, Antonius - Am II. Sontag nach der heiligen drey Königen tage/ Lection aus Paulo zum Römern am 12. Cap.

Corvinus, Antonius - Am II. Sontag nach der heiligen drey Königen tage/ Lection aus Paulo zum Römern am 12. Cap.

LIeben Brüder/ wir haben mancherley gaben/ nach der gnade/ die vns gegeben ist. Hat jemandes weissagung/ so sey sie dem Glauben ehnlich. Hat jemand ein ampt/ so warte er der lere/ Ermanet jemand/ so warte er des ermanens. Gibt jemand/ so gebe er einfeltiglich. Regirt jemand/ so sey er sorgfeltig. Vbet jemand barmhertzigkeit/ so thue ers mit lust.

Kurtze auslegung der Epistel.

DIese Lection volget beim heiligen Paulo balde auff die Epistel/ so am vergangen Sontage gehabt vnd gelesen haben/ vnd sagt auch von den gaben/ welche Gott den seinen aus gnade gibt/ Das man derhalben das gleichnis/ am vergangen Sontage/ eingefurt vnd gehandelt/ wol betrachten vnd behertzigen mus/ Denn es ist viel dran gelegen/ das ich weis/ das alle gleubigen/ ein leib inn Christo/ vnd derhalben einer dem andern zu dienen vnd zu helffen schuldig sey/ Eben wie auch jnn einem leibe viel glieder sein/ die doch nicht ein gescheffte haben/ ja wenn solche Concordi vnd einigkeit/ zu dienen vnd zu helffen/ jnn der Kirchen nicht ist/ wie wir sehen/ das ein glieid dem andern am leibe dienet/ was kan ein solche Gemeine fur ein Gemeine sein? Da müssen spaltung vnd secten/ vnd so viel ergernis einreissen. Demnach/ ob wol die empter vnd gabe/ vnter denen so an Christum gleuben mancherley sind/ so sollen dennoch dieselbigen alle dahin gerichtet werden/ das sie die ehre Christi fordern/ vnd dem nehisten dienen/ Welchs denn hie jnn einer Sum/ vnd jnns gemeine/ sol geredt vnd gesagt sein. Es erzelet aber volgendes der Apostel etliche gaben vnd empter/ jnnsonderheit/ mit dem namen/ vnd leret daneben/ wie man sich jnn einem jedern halten solle. Spricht vnd sagt also.

Hat jemand weissagung/ so sey sie dem glauben ehnlich.

Weissagung ist zweierley, nemlich Künfftige dinge verkündigen/ vnd die heilige Schrifft auslegen. Die künfftige dinge etwa verkündigt haben/ musten freilich nichts verkündigen/ das Gottes wort vnd dem glauben nicht ehnlich were/ ja man hat solche leut etwa Videntes/ das ist/ seher geheissen/ drumb das sie so warhafftige vnd gewisse dinge verkündiget haben/ als hetten sie dieselbigen mit den augen gesehen/ Also sols auch mit auslegung der schrifft zu gehen/ das dieselbigen dem glauben ehnlich sey. Denn wo solche auslegung nicht ehnlich sind dem glauben/ da leget man die Schrifft nicht aus/ sondern verfelschet sie/ Ja vnsere auslegung sollen aus der schrifft fliessen/ vnd nicht aus vnsern köpffen jnn die Schrifft gebracht werden/ wie auch S. Peter sagt Der da redt/ der rede als Gottes wort. Das ist nu das erste vom weissagen.

Volget das Ander. Hat jemand ein ampt/ so warte er des ampts.

Ich halte es dafur/ der Apostel rede hie von dem Ampte/ das S. Stephan vnd seinen gesellen inn den geschichten der Aposteln befohlen ward/ nemlich/ die krancken vnd armen ersuchen/ vnd denselbigen handreichung thun/ wie man auch itzt jnn etzlichen landen vnd Stedten/ Diaken hat/ die die Sacrament reichen/ vnd den armen dienen müssen. Es sey aber dis ampt/ oder ein anders/ so sol der/ der dazu beruffcen wird/ desselbigen mit vleisse warten/ angesehen/ das Christus jm selbs zurechnen wil/ was wir den seinen gutes gethan haben.

Volget das dritte. Leret jemand/ so warte er der lere. Ermanet jemand/ so warte er des ermanens.

Vorhin hat er gesagt/ vnser lere solle Gottes wort ehnlich sein. Nu wil er auch hie inn solchem ampte vleis von vns gefordert haben/ das wir jmer anhalten/ vnd ob wol wenig besserung furhanden/ nicht ablassen/ Denn das ampt mus ausgerichtet/ vnd das wort getrieben sein/ auff das sich niemand an jenem tage zu entschüldigen habe/ wie auch Christus sagt/ Wenn ich nicht komen were vnd hette es jnen verkündiget/ so hetten sie keine sünde. Solchen vleis fordert auch der Prophet da er sagt/ Ruff höre nicht auff/ vnd verkündige meinem volcke jre sunde. Item/ Paulus jnn der Epistel zu Timotheo/ da er spricht/ Halt an zur zeit/ vnd zur vnzeit etc. Mercke das leren vnd ermanen/ bey einander stehen/ vnd eins dem andern allezeit folgen mus/ Denn wenn ich die vnuerstendigen/ was sie thun vnd lassen müssen gelert habe/ so mus ich sie auc hdarnach jmmer vermanen bey dem ienigen das sie gelernet haben/ zu bleiben.

Volget das vierde. Gibt jemand/ so gebe ers einfeltig.

Dis geben mag man deuten von dem Diaken ampt/ dauon wir vorhin gesagt haben/ das die meinung sey. Wem das ampt/ den armen furzustehen/ befolhen ist/ der gebe also/ das er nicht/ wie die heuchler/ viel geprengs oder rhümens mache/ Gebe auch also/ das er nicht nach gunst odder freundschafft/ sondern nach eines jedern notdurfft gebe. Denn wo man mit solcher einfeltigkeit nicht gibt/ da macht man das ampt zu schande/ vnd gibt nicht/ wie der Apostel sagt/ einfeltiglich.

Volget das Fünffte. Regirt jemand/ so sey er sorgfeltig.

Es hat jr Regiment vnd Fürgenger Gottes Gemeine/ So hat auch jre Heupter vnd Fursteher die eusserliche Policey. Dieweil nu beide das geistliche Regiment/ so durchs wort/ vnd auc hdas eusserliche/ so durch Gesetze vnd das sc hwert administrirt wird/ Gottes wort/ ordnung vnd befehl haben/ so wil warlich den Fürstehern gemelter Regiment hoch von nöten sein/ das sie mit sorgfeltigkeit regieren/ wie jenen hie der Apostel befolhen hat.

Denn was die geistlichen/ das ist/ die Diener des worts verseumen/ sol aus jren henden gefordert werden/ Wie zum Propheten gesagt ist/ Sagstu es dem sunder nicht/ so wil ich sein blut aus deinen henden fordern. Desgleichen/ was die weltlichen Regenten verseumen/ wil Gott aus jren henden auch fordern/ dieweil das gericht/ darinnen sie nachlessig gewesen/ nicht jr/ sondern wie Josua sagt/ des Herrn ist. M;ercke das man wol zu gleich ein Magistrat/ vnd ein Christ sein kan/ Denn warumb wolte sonst Paulus/ die Regenten hie/ als gliedmassen des leibes Christi ansprechen.

Volget das Sechste. Vbet jemand barmhertzigkeit/ so thue ers mit lust.

Es kompt hie der Apostel vberein im Euangelio mit Christo/ da er sagt. Seid barmhertzig/ wie ewer Vater im Himel auch barmhertzig ist. Doch legt der Apostel den spruch Christi besser aus/ vnd sagt/ Das man solche barmhertzigkeit/ mit lust vnd liebe vben müssen/ sintemal gezwungene dienst/ Gotte nicht gefellig sein/ vnd ein freiwillig volck haben wolle/ wie auch gemelter Aposteln anders wo sagt. Einen frölichen geber hat Gott lieb. Wer nu im Reich Christi ist/ vnd seinen gliedmassen entweder zu dienen beruffen/ oder aber sonst aus Christlichem gemüte/ barmhertzigkeit an jnen mit eigener hab zu vben geneigt ist/ der thu es mit lust/ vnd halte es nicht da fur/ das es verloren sey/ was er des thu/ sondern das er mit solcher weise viel mehr die rechten/ vnd aller besten güter samle/ die kein dieb stelen/ oder kein rost verzeren konne. Hieher gehört nu alles was jnn dieser Lection/ von der liebe gegen die heiligen/ notdurfftigen armen/ vnd gastfreiheit gesagt wirrd/ Vnd ist nicht von nöten/ das man hie auff ein jedes gebot des Apostels/ eine sonderliche glose mache/ sonderlich/ dieweil bey nahe alles/ was weiter jnn dieser Lection begriffen ist/ die brüderliche liebe/ vnd barmhertzigkeit gegen den nehisten mit sich bringt. Alleine das mercke vleissig/ das er jnn all vnserm thun/ damit wir beide Gott vnd dem nehisten dienen/ sonderlichen ernst vnd vleis fordert/ vnd alle heucheley ausschleusset/ Denn hieher gehört/ das er sagt.

Seid nicht trege/ was jr thun solt/ Seid brünstig im Geiste/ Frölich jnn Hoffnung/ Gedultig im trübsal etc.

Diese wort fordern sonderlichen ernst/ vleis/ eiffer vnd geist/ vnd wollen gar kein schmeichley oder heucheley/ jnn vnserm thun vnd lassen/ dulden oder leiden/ sondern viel mehr ein solch herz haben/ das auffrichtig sey jnn allen seinen sachen/ sie belangen den glauben oder die liebe des nehisten. Wenn du aber woltest sagen/ Wer kan allezeit/ brünstig im Geist/ frölich jnn hoffnung/ gedultig im trübsal sien? Wer kann jmmer den feinden guts thun? So mus man dir wol nach geben/ das das fleisch zu weilen schwach vnd vngedultig ist. Aber doch haben wir hie einen guten radt/ wie wir vns jnn solchem falle halten sollen/ nemlich also. Wenn vns solche schwacheit anfiichtet/ vnd dich zur rache vnd vngedult bewegen wil/ so fleuch zu Gott/ vnd bitte/ das er dir jnn solcher schwachheit/ eine Christliche stercke vnd bestendigkeit geben wolte/ Denn darumb sagt/ auch der Apostel/ Wir sollen mit dem gebete anhalten/ das er wol weis/ das vns jnn solchem ansuchen/ keine hülffe versagt wird. So hat vns Christus selbs derhalben so viel verheissung gegeben/ hin vnd wider jn den Euangeliis/ Vns solle gegeben werden/ was wir bitten/ das er vnsere schwachheit/ vnd des fleisches vngedult wol gekand hat. Lasset vns derhalben bitten jmmerdar/ erstlich darumb/ das wir allezeit ein auffrichtig hertz zu Gott behalten. Zum andern/ Das wir seiner Gemeinen/ nütze/ vnd förderlich sein/ vnserm nehisten/ Ja auch feinden gutes thun/ vnd jmmer dem nachkomen mügen/ das vns der Apostel inn dieser Lection zu thun befolhen hat. Thun wir solches mit ernste/ so wird er vns auch gewislich seinen guten geist geben/ der dis alles jnn vns wircke vnd ausrichte.

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/c/corvinus/corvinus_2_nach_epiphanias_lection.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain