Ich glaube an Jesum Christum/ gecreutziget vnd gestorben.

Psalm 110.

Der Herr hat geschworen/ vnnd wirt jhn nicht gerewen. Du bist ein Priester ewigklich/ nach der weyse Melchisedeck.

WEyl der HErr Jesus an diesem tage sich selbs für vnsere sünde am stamm des creutzes hat auffgeopffert/ sollen wir die krafft vnnd verdienst dieses einigen vnnd waren versönopffers/ erkennen lernen/ damit wir wissen/ wie doch vnsere sünde versönet vnd bezalet sind/ vnd das wir vns für allen andern erdichten Gottesdiensten/ opffern/ messen/ wercken/ hüten können/ dadurch man die sünde der lebendigen vnd der todten versönen/ vnd derselben pein bezalen oder lindern wil.

Es ist das eynige opffer/ da der Herr Jesus sein leyb vnd leben/ vnnd rosinfarbes blut ein mal für vnsere sünde auffgeopffert hat/ ddarmit er eine ewige erlösung erworben/ vnd alle vnsere erbsünde/ vnd wirckliche schult/ auff ein mal volkömlich bezalet/ vnd hat vns darmit ein ewige versönung vnd gerechtigkeyt erworben/ sampt dem heyligen geyste/ vnd ewigem leben.

Christus gibt sein leben zum schultopffer/ Esaie 53. vnd zum lösegelde/ Mathei am 20. vnd zu einer versönung für vnser vnd der welt sünde/ 1 Johan. 2.

Vnd Gott macht seinen Son zum sündeopffer/ auff das wir in jm die gerechtigkeyt würden/ die für jhm gilt/ 1. Corinth. 5. Vnd Christus ist durch sein eygen blut einmal in das heylige eingangen/ vnd hat eine ewige erlösung erworben/ Hebreo. 9. Vnnd hat ein opffer für die sünde auffgeopffert/ das ewigklich gilt/ Hebr. 10.

Die schuld vnnd sündeopffer sindt fürbilde gewesen/ dises einigen opffers/ gleich wie auch das Osterlemblein/ vnd die besprengung des vihischen bluts.

Die speißopffer sind Fürbilde gewesen der predigte/ wie die lob vnnd danckopffer/ sampt dem reuchwerck/ das gebete/ bekentnuß vnd die dancksagung bedeutet haben.

Darumb haben sich die Ertzvetter auß jren opffern/ neben dem wort erinnert/ der opffer des newen Testamentes/ nemlich des einigen versüünopffers/ predigte vnd lobeopffers.

Nun aber Christus das werck der erlösung/ durch seinen todt volbracht/ hat er die schatten vnd figuren des alten Testaments erfüllet vnd abgethan/ vnnd wil das wir vns seines eynigen opffers trösten/ vnd darneben seinen todt verkündigen/ vnd jm dancken.

Solche lob vnnd danckopffer lest jm Gott gefallen/ sampt vnserm Christlichen leyden vnd wercken/ wenn es geschicht in der erkentnuß vnd vertrauwen dises eyniigen vnsers Hohenpriesters.

Dieweyl vns der Herr im wort vnd Sacrament/ den schatz vnd verdienst seines opffers/ vorstellet vnnd außteylet/ vnnd besprenget vns mit seinem blut/ 1. Pet. 1. So werden wir dises rechten ablaß/ auß der seyten Christi geflossen/ theylhafftig/ wenn wir disen vnsern gerechten fürsprecher erkennen vnnd annemen/ Denn durch sein erkentnuß werden wir gerecht/ Esaie 53. vnnd haben das ewige leben/ Johan. am 17. Die menschen aber können weder für vns opffern/ noch diß eynige opffer vns applicieren oder zueygenen/ durch jr werck vnd meß halten/ Denn der gerechte lebet seines eygenen glaubens/ Abacuc am 2.