Luther, Martin - Von menschen leren zu meyden.

Luther, Martin - Von menschen leren zu meyden.

Wittenberg, M.D.XXij.

Jhesus

Allen die diß büchle leßen oder hören!
Geb gott gnade vnnd verstandt
Amen.

Ich Martin Luther hab diß kurtz büchle/ zu trost vnd erredtung der armen gewissen/ so in klöstern oder stifften/ durch menschen gesetz/ gefangen ligen/ laßen außgeen. Da mit sie sich rüsten vnnd stercken künden/ durch das wort gottes zu besten in tods nöten/ vnnd andern anstössen. Aber darneben laß ich wissen/ die frechen vnzüchtige köpfe/ die yr Christlich weßenn allein da mit auff werffenn/ das sie/ eyer/ fleysch/ milchessen/ nichts beichten/ bild sturmen kunden rc/ das ich yn hiemit nicht will gedienet haben Denn ich acht sie für die schantpal leüt die das heerläger/ von Israhel besudtelten/ So doch gepotten war dem volck solche zucht/ dz wem etwas nott war/ solt außer dem läger geen/ vnd sein not mit erden vergraben. Alßo müssen wir auch diß vnsaubere widhoppen in vnßerm nest leyden/ biß sie got eyn mal mores lernet Ich will dise Christliche freyheyt nur den armen gefangen demüttigen gewissen prediget haben das wo arme kinder Nonnen oder Münch sind/ die geren herauß weren/ yr gewissen berichten mügen/ wwie sie mit got vnnd on gefar erauß komen/ vnnd solcher freyheyt zuchtiglich vnnd Christlich brauchen künden. Gott geb darzu seyne gnade.

Amen.

Das menschen Leren zu meyden sind. Grund auß der schrifft.

Der erst. Moses Deuteronomio/ das ist / yym funften buch am vierden Capitel spricht

Ir solt nicht zu thun zu dem wortt/ das ich euch sage/ vnd auch nichts dauon thon.

Wirt aber yemand sagen/ das Moses rede von seinen wort allein. Denn vber Moses bücher sind auch vil Propfheten bücher vnd dz gantz new testament darzu than. Antwort: Es ist aber nichts newes darzu than/ sondern eben daselb/ das in Moses büchern steet/ dz steet in den andern. Denn die andern bücher thun nichts meer/ denn zeygen die exempel/ wye Moses wort/ gehalten oder nicht gehalten sey. Vnd wirt woll mit anderley worten vnnd geschichten beschriben. Es ist aber alles dieselbige eynige lere vnd meynung Vnd hie ist zu trotzen wider sie. Das sie in allen büchern/ außer Moses büchern/ eyn wortt zeygen/ das nicht zu vor in Moses buch erfunden werd. Denn dz ist vngetzweyfflet/ das die gantze schrifft auff Christum allein ist gericht Nu spricht Christus Joan.5. Moses hat von mir geschriben/ darumb ists alles in Moses büchern/ als ym haubt brye/ was in andern büchern ist.

Der ander ist Isaias am neun vnd zwentzigisten/ vnd der her zeuchet es an Mathei.xv.

Diß volck eeret mich mit seinen lippen/ yr hertze aber ist ferne von mir Aber sie dienen mir vergeblich Das sie leren/ der menschen lere vnd gepott.

Merck das wort Christi/ daß erß vergeblichen deinst heist got nach menschen leren dienen/ denn Christus ist nicht drunckenn noch toricht Vnd auff sein wort ist aller dinge zu bawen/ für alle Engel vnd Creaturn.

Der dritte ist Der selbige Christus/ ymm selbigen Capitel Mathei am xv.

Was zum mund ein geet/ das macht denn menschen nicht vnreyn/ Sondern was zum mund auß geet das macht den menschen vnreyn.

Dißen außspruch vnd vrteyll soll man woll fassen/ den er isst mächtig/ vnnd stosset mit gewalt ernydder alle lere/ brauch/ vnd leben/ ynn vnderschayd der speyßen/ vnnd macht frey alle gewissen von allen gesetzen vber speyß vnnd tranck. Nemlich das es frey ist/ milch/ putter/ ayer/ köße/ fleysch zu essenn auff alle tage/ es sey sontag oder freytag/ fasten oder aduent. Vnd darff niemant puttergelt eynlegen/ oder brieffe darzu lößen/ Denn es stehet fest diß worts vnnd treuget nicht. Was zum munde eyn geet/ macht den menschen nicht vnreyne.

Darauß volget zum ersten/ das erlogen ist das/ man saget S Peter hab die fasten eyngesetzt. Vnnd sey eyn gepott der kirchenn/ bey eyner todsünd nicht ayer/ putter/ milch/ fleysch darenn essenn/ denn S Petrus oder die kirche setzt vnnd leret nichts wider Christum. Vnnd ob sie es theten were yn nicht zu folgen Nicht das es böße sey zu halten/ Aber böße ist/ eyn nott vnnd gepott drauß machen/ das doch frey ist/ Vnnd für geben es mache vnreyn vnnd sey sünd/ das doch Christus selbs sagt/ es sey nicht sünd/ vnd mache nicht vnreyn.

Zum andernn volget/ das lautter buberey des teuffels ist das der Bapst/ brieffe verkaufft vnd laube gibt/ puitter/ fleysch rc zu essen/ so es zu vor frey ist von Christo ynn disem spruch geben vnnd erlaubt.

Zum dritten ists auch yrthum vnnd lügen/ das man golt fast/ banfast/ Aposteln vnnd der heyligen abend fasten/ nöttig macht bey eyner sünden/ als eyn gepott der kirchen. denn es stet wider solchs alles/ diß wort Christi Was zum mund eyngeet macht den menschen nicht vnreyn Sondern die fastel sol frey wilkörig sein/ der tage vnd der speyße halben ewigklich.

Zum vierden synd die orden S. Benedictus/ Bernhardus/ Chartüßer/ Vnnd alle ander/ die da meyden fleysch vnnd des gleychen/ auß nott vnnd gepott alß sey es sunde/ widder Christum. Denn yr dinck saget nicht anders/ denn strackts wider Christus mund/ alßo. Was zum mund eyngeet/ macht vnreyn Vnnd Christus muß yr lügner seyn/ da er saget/ Was zum mundt eingeet/ macht den menschen nit vnrayn Vnd alßo sihestu/ dz dißer eyniger spruch Christi mächtiglich verdampt alle orden vnd geystlich regyment Denn so das nicht vnrayn macht/ das zum mund eyngeet/ wie viel weniger wirt vnreyn machen das an den leib gelegt wirt es sey kutten/ röck/ hembd/ hoßen/ schuch/ mantel/ grün/ gel blaw/ rodt/ weyß/ bund wie man will/ desselbigen gleychen auch die stette/ alß kirchenn/ Cellen/ hauß/ kämer.

So folget/ das wer es für sind hellt'/ ob eyn münch außer seyns ordens kleyd gienge/ vnnd wolts nicht frey seyn lassen der macht Christum aber mall zum lügner/ vnd setzt sünd darauff/ da sie Christus abthut/ vnd spricht/ ya/ da Christus neyn sagt. Was synd den nu sölliche Münche für leyt anders, Den die stracks Christo yn sein angesicht sagen/ du leugest/ Es ist sünd da/ da du sagest/ es sey nicht sünde.

Es hilfft nicht, das sie S. Bern. Greg. Francis., vnnd meer heyligen wöllen auffbringen. Man muß Christum hören Was der saget Welcher alleyn ist zum doctor gemacht vom Vater auff dem berge Thabor/ da er sprach Mathei am sibentzehenden. Diß ist meyn lieber Son an dem ich ain wolgefallen habe/ den höret/ Er hat nicht gesagt Hörent Bern. Greg. rc. Sondern/ den höret/ den/ den/ den/ meynen lieben Son.

Wer waist wie die heyligen hierin/ gesündigt oder recht than haben Sie habens nicht auß not vnd gepot gehaltenn/ haben sie es aber auß nott vnnd gepot gehalten/ so haben sie geyrret/ vnd yn ist nicht zu folgen/ vnnd Christus zu lassen.

Diß alles bestetdiget das Christus am selben ort Mathei am xv. folget Was auß dem mund geet/ das machtt den menschen vnrayn/ den auß dem mund geet von dem hertzen/ böß/ gedancken/ bulerey/ eebruch/ dieberey/ lügen/ lesterung re. Solchs macht den menschen vnreynn.

Hie fragen wir/ so das allein sünd vnnd vnrein ist/ das auß dem hertzenn gehet wie hie Christus mechtigklich örtert vnnd schleust/ wie kann den/ putter/ milch/ ayer/ keße vnrein machen/ das nicht auß dem mund noch hertzen/ sondern auß den bauch der küe vnd hennen kompt. Wer hat ye gesehen/ fleysch/ platten kutten/ klöstern/ härin hembd/ auß dem mund geen. Es müsten die küe sündigen/ das sie milch/ vnd putter/ geben vnd kelber tragen.

Darumb ists nicht allein/ gott lesterung/ vnnd lyegen/ vnnd triegen Sondern recht narren werck vnnd affenspils/ alle München vnd menschen gesetz von speyssen/ kleydern/ vnd steten vnd allem eußerlichem ding.

War ists/ das yemand kann ein böße lust habenn zu vbrigem essen vnd kleyden/ aber dan geet auss dem hertzen/ vnd kan eben so woll an fischen als an fleysch/ an grawem tuch/ als an rottem sammet geschehen Summa Summarum Christus leüget yn disen worten nicht Was zum mund einget macht nicht vnrayn. Was aber zum mund außgeet/ das macht vnrayn.

Wenn aber das war ist/ das solchs nicht vnrayn noch sünd ist/ so man lassen/ was menschen gepott ist/ so muß widerumb auch nicht reyn noch verdienst sein/ wenn manß helt vnd thut/ Seytemal allein/ das reyn vnd verdienst ist/ das der sünd vnd dem vnraynen entgegen ist/ Darumb ist ynn aller Münchenn lebenn/ weder rayn noch verdienst/ Das meynet auch der herr Christus/ da er saget Mathey. xv. Vergeblich dienen sie mir mit menschen gepotten Warumb vergeblich. Nemlich darumb Das/ nachlassen kein sünd/ vnd halten kain verdienst ist Sondern alles frey/ Darumb betriegen sie sich sleb/ vnd machen verdienst da keyner ist/ vnnd fürschten sich für sünden/ da keine ist. Wie der xiii. psalm sagt Sie fürchten sich da keine forcht ist.

Der vierde is S. Paulus ynn der ersten Epistel zu Timotheo am vierden.

Der geyst daget klerlich Das inn letzten zeyten etlich werden vom glauben tretten vnd achten auff die yrrigen geyste vnd leren der teuffell. Durch die falschreder ynn gleyssnerey/ vnd die eyn brandmal haben yn yrem gewissen Vnd verpieten eelich zu werden/ vnd zu meyden die speyße/ die gott geschaffen hatt zu nemen mit dancksagung den gleubigen/ vnd denen/ die die warhayt erkennet haben. Denn es wirt geheyliget/ durch das wort gottes vnd gepett Wenn du solchs den brüdern fürlegest/ so wirstu eyn guter prediger Christi sein/ aufferzogen/ mit worten des glaubens vnd guter lere/ die du erlanget hast. Der vngeweyheten aber vnd altvettlische fabeln entschlahe dich.

O Woll eyn donner vnd wetter ist das/ ver alle menschen werck/ leren/ vnd orden Auffs erst/ wenn sie rhumen yr dinck kom vom Bapst vnnd heyligen Vetern Was wirtt Christus darvber richtenn Wirtt er nicht also sagenn. Paulus mein Apostel/ ist meyn außerwelet rüstzeug/ wie Lucas schreybett yn den Apostel geschichten am neunden Warumb habt ir den sein wort nicht lassen meer gelten/ denn des Bapst vnnd der Vetter/ die ir nicht wisset wes rüstzeug sie seind Wie werden sie da besteen.

Auffs ander/ fragen wyr sie/ ob nicht/ putter/ eyer/ fleysch/ milch/ vnnd alle speyß/ die sie meyden an den fasttagen vnd in den orden/ gott geschaffen habe/ vnd gottes gute creatur sind. Nun/ so ists gewiß/ das sie die seind/ von denen hie Paulus sagt das sie verpieten die speyße die got geschaffen vnd den gleubigen zu brauchen geben hat/ Vnd verpieten den eellichen stand darzu Also/ das sie nicht für vber kunden/ diser spruch trifft vnnd meynet sie. Nu last sehen/ was Paulus von in helt vnd wie er sie tadelt.

Zum ersten/ seind sie abtretten vom glauben/ den es were vnmüglich dz sie solche lere vnd werck auffrichten wen sie nicht da durch gedechten frum zu sein vnd selig zu werden.

Solcher wan aber ist schon eyn gewiß zeychen/ das sie vom glauben sind abtrünnig worden/ Seyttemal alleyn der glaube das thun soll/ dz sie an den wercken suchen/ wie offt gesagt ist.

Zum andern/ achten sie auff yrrige geyster. Er spricht nicht auff yrrige menschenn/ schondern auff yrrige geyster/ das synd die da geystlich ding fürgeben/ vnd geystlich sich heyssen lassen/ vnnd yr weßen soll auß dem geyst vnnd ynn dem geyst seyn. Weyll sie nu glaubloß sind/ ists nicht müglich/ das sie nicht yrren solten ynn geystlichen sachen. Darumb folget es feyn auff eynander/ Abtretten vom glauben vnnd folgen dem yrthum ym geyst.

Zum dritten/ yrlere nennet er teüffels leren/ das muß auch folgenn/ wa glaube vnnd der ware geyst nicht ist/ da gibt der teüffell eyn den yrrigen geysten vnd füret sie mit hübsch geferbeten leren vnnd wercken/ das sie sich duncken lassen/ sie sind zu mall geystlich. Aber weyll die lere nicht auß der schrifft fleüsset/ kan sie niemant anders denn des teüffels sein.

Zum vierden/ sind sie falsch reder/ denn sie füren vnnd zwingen auch zu weyllen/ die heylige schrifft/ vnnd der Vetter spruch/ auff yre lere/ Wie wir teglich an ynn sehen. Aber das ist falsch vnnd erlogenn Seyttemal die schrifft auffs höhest wider sie ist.

Zum funfften/ ists eytell gleyssenerey Das ist war/ vnnd darff keyner gloßen/ denn alles yr weßen ist nur eyn scheynn vnd gleyssen/ ymm eußerlichem wandel der speyße vnd klayder.

Zum sechsten/ haben sie ein brandmall in yrem gewissen das ist/ ein vnnaturlich gewissenn/ denn da keynne sünd vnnd gewissen ist/ da machenn sie sünd vnnd gewissenn/ wie obenn gesagt ist/ gleych wie eyn brandnarbe ein vnnaturlich mal ist am leybe.

Zum sibennd/ Verpieten sie die Ee/ damit/ das sie solchen stand auffrichten/ der on Ee sein soll/ wie wir sehenn beyde an Pfaffen vnnd München Darumb siche hie das vrtayll gottes vber solche lere vnnd stende/ das es teüffels leren/ yrrige lerenn/ falsche leren/ vnglaubige leren/ gleyßnischs leren/ sind Hylff gott/ wer will darinnen bleibenn/ wenn got selb solch vrtayll fellet. Was hilffs/ das du taußend gelübt vnd ayde than hettest auf sälliche lerenn/ Ja ye herter das gelübt ist/ ye meer es zu reyssen ist/ weyll es auff teüffels leren wider got geschehen ist.

Aber sihe zu/ wie feyn drehen sie sich auß/ vnd wenden dißen spruch von sich/ sagen er gee sie nichts an/ sondern die Tacianer die ketzer/ die den Eelichen stand allerding verdampten.

Aber Paulus saget hie nicht von denn/ die denn Ee standt verdamnen. Sondern die yn verpietenn/ vmb gleyssenerey willen/ das sie geystlich sein wöllen/ Es sey aber also/ das S. Paulus wider die Tacianer rede. Wenn aber der Bapst thut das die Tacianer thätten/ warumb solts nicht auch auff ynn gesagt seyn/ Es sey Tacianer oder Bapst/ so seynd sie hie troffen/ die die ee verpieten. Die wort Pauli/ verdamnen das werck on vnderschayd der person. Wer die ee verpeutt/ der ist des teuffels Junger vnnd Apostel/ wie die wortt klerlichenn lautten. Weyll denn das der Bapst thut/ So muß er des teuffels Junger seyn mit allen den seinen/ oder Sanct Paulus muß liegen.

Zum achten verpieten sie speyße die gott geschaffen hatt/ Da sihestu aber mal/ das menschen lere/ dem teuffel/ gezeygentt werden von gott selbs durch denn mund Pauli Was wiltu grössers vnnd grewlichers hören von menschen leren. Denn das es abtrünnig ding ist/ vom glauben/ yrrig/ falsch/ teuffelisch/ gleyßnerisch. Welchen dißer spruch nicht gnug ist/ Was mag denn gnug seyn. Ist aber die lere von speyße verpietenn teuffelich vnnd vnchristlich so wirt die von den kleydern/ platten/ stetten vnd allem eußern wandell/ ebenso woll teufflisch vnd vnchristlich sein.

Aber hie drehen sie sich abermal auß/ sagen S. Paulus rede von den Manicheer Da fragen wir nichts nach S. Paulus redet von den speyße verpieten/ das thut der Bapst mit denn seynen/ er sey eyn Manicheer oder Tacianer/ Paulus sagt vom werck/ das wir am Bapst sehenn/ Darumb künden wir denn spruch nicht von ym wendenn. Wenn heut oder morgen eyn andern auff stund vnnd verputt auch die speyße/ solts darumb nicht von ym gesagt seyn/ ob er keynn Manicheer were. Mit der weyße/ mocht man frey thunn/ was Paulus hie verpeut/ vnnd sagenn es treffe vnß nicht/ sondern die alten Maicheer Nicht also Ist der Bapst nicht eyn Manicheer mit seynen München vnd Pfaffen/ das laß ich seyn Ich sage aber gleych woll/ das er thut vnd leret wider S. Paulus lere/ also fast als keyn Manicheer.

Zum neunden/ sind sie vnndanckbar/ den got hat die speyße geschaffen (spricht hie S. Paulus) das man sie mit dancksagung empfahen soll Das schlahen sie auß/ auff das sie ya nicht danckbar seyn müssen gottes güttigkeyt Das macht sie sind nicht gleubig noch erkennet haben die warheyt nicht/ den Paulus spricht/ den gleubigen vnd denn die erkennet haben die warheyt sind sie geben zu brauchen mit dancksagung Sind sie aber vngleubig vnd erkenen die warheyt nicht/ wie sie hie S. Paulus schilt/ So sind sie gewißlich hayden/ vnchristen/ blind vnd vnweyße/ Das heyst/ mein ich ye/ den Bapst/ Pfaffen/ Münche loben.

Zum zehendenn/ sind sie/böße schedliche prediger von ynn getadttelt Denn er spricht hie Timotheus sey eyn guter prediger/ mit worten des glaubens vnd guter lere aufferzogen/ Wo er solchs fürhalte den brüdern/ So müssen ye die widerumb böße prediger vnd mit worten des vnglaubens vnd bößer lere aufferzogen seyn/ die das widerspil leren.

Zum Eylfften/ nennet er solch lere/ vngeweyhete/ Alltvettelsche merlin Ist das nicht nerlich geredt Die grossen lerer gen mit merlin vmb/ da die allten vetteln hynder dem offenn von klaffen/ vnnd ist vngeweyhet/ vngeystlich/ vnheylig/ geschwetz/ so doch sie eyttel heylikayt drauß machen Wer hat nu menschen lere ye gehöret so grewlich auff alle weyße tadteln.

Das ist/ abtrinig/ vngleubig/ vnchristlich/ heydnisch/ yrrig/ teüffelich/ falsch/ gleyssnerisch/ verseerlich/ am gewissen/ vndanckbar/ wider die eer vnd gotes Creatur/ schedlich fabeln vnd alt vettelsch geschwetz sind. Fleüch wer flyehen kan auß dißem vrteyl gottes.

Der funfft ist abermal S. Paulus zu den Colosszern ann dem andern Capitel

Last euch nyemandt gewissen machen vber der speyße oder vber dem dranck/ oder vber eyns teylls tag/ die da fest/ oder new monden oder Sabther sind. Welchs ist der schatten des zukunfftigen. Der leyb ist aber in Christo Laste ich niemand dz zill verrucken/ der auß eygener wal eynher get in demut vnd geystligkeyt der Engel des er keinß nie gesehen hat/ vmb sunst auffgeblaßen yn seynem fläyschlichen synn. Vnd helt sich nicht am haubt auß welchen der gantz leyb durch die geleng vnnd fügen/ handreychung entfahet vnd sich an eynander anthelt/ vnd also wechst yn eyne grösse die got gibt/ SO yr den nu mit Christo gestorben seyt/ von den elementen der welt Was last yr euch/ als lebetet yr/ mit satzung gewissen machen/ Die da sagen. Dan soltu nicht anrürn/ das soltu weder essen noch trincken/ das soltu nicht anlegen (welchs doch alles sich vnderhanden verzeret) nach den menschen gepotten vnd leren/ die eyn scheyn haben der weyßheyt/ durch selberwelete geystligkeyt vnd demut Vnd durch das sie des leybes nicht verschonen/ vnd nu das fleysch nicht kost wenden zu seyner notdurfft.

Redet hie S. Paulus auch von den Manicheer oder Tacianer Oder kan man hie für/ die Papisten entschuldigen. Er redet ya wider die/ so die gewissen fangen mit menschenleren/ vnd machen gewissen vber der speyß/ tranck/ klayder/ tage/ vnd allen wz eußerlich ist/ welch man nicht leugken kan/ Das der Bapst/ stifft/ vnd klöster thun/ mit yren regeln vnd statuten/ da sie weren nicht fleysch/ eyer/ putter/ essen/ gemeyne vnd sonderbare klayder tragen Nu stet hie Paulus vnd spricht Auffs erst Last euch keyn gewissen machenn/ richten/ vrteyllen oder verdamnen/ yn der speyße/ tranck/ kleyd/ tage Was ist das gesagt. Denn seyt keine Pfaffen noch Münche/ vnd halt des Bapsts gsetze ya nicht/ glaubt ym auch nicht/ das es sünnd oder gewissen say/ was er für sünd auffgibt/ Sihe/ alßo gepeut gott durch Paulum Des Bapst vnd der klöster gesetz/ verachten/ vnd frey zu halten/ das sie nicht die gewissen fangen. Das ist ye so viel gsagt/ werdet nicht Münch noch Pfaffen vnnd es es worden ist/ der kere wider/ oder halte solche ding frey vnd on nott des gewissens.

Vnnd wie wol ditz von den Juden gesagt ist/ die nach denn gesetz Mosi solchs hielten Denn er spricht/ Solchs sey der schatten vnnd figur gewßen des zukunfftigen. Der lebt aber selbs ist yn Christo. So gilts doch vill meer wider des Bapst vnd der Münche satzung/ den so das auffhöret/ dz gott gesatzt hat vnd soll nicht meer die gewissen binden Wie vill mer soll von menschen nichts auffsatzt noch gehalten werden/ das die gewissen pinde Auch wirt weytter hernach folgen/ von denn lautter menschen gesetzen. Nemlich

Auffs ander spricht er. Last euch nicht das zill verrucken oder neben laufft zu richten nach dem kleynodt. Was ist das anders/ den vom glaubenn/ der da ist alleyn der eynige rechter weg zum kleynodt der selikeyt zurlauffen/ auff die werck fürren/ vnnd durch andere/ wege gen hymel streben/ vnd fürgeben das sey die ban zum kleynodt/ wie den die orden vnnd Bapsts leren thun Was geben sie aber für wege für. Höre zu.

Auffs dritt Spricht er/ ynn selberweleter demut vnd geystligkayt der Engel/ wie het er die orden baß kund treffen/ Ists nicht alßo Das der Bapst vnd sie/ alle yr geplerre von yrem gehorßam treyben/ das soll die edlist tugent sey das ist die thüre geystliche demut der Papisten. Aber wer hat sie gepotten Sie selber haben sie erfunden vnd erwelet/ sich selb zu verfüren. Denn damit haben sie sich selb außzogen/ auß der gemeinen demut vnd gehorßam/ die got gepotten hat das ein yetlicher dem andern sich demütigen vnnd vnderthun soll. Sie aber sind keynem menschen auff erden vnderthan Sondern gantz außzogen/ vnd haben eyn eygen gehorßam vnnd demut angericht/ nach yren statuten. Noch geben sie für/ yrer geharßam sey vber menslich/ volkomlich vnnd gleych Engelisch/ So keyn vngehorsamer vndemüttiger volck auff erden ist/ den sie.

Desselbigen gleychen/ haben sie auch geleubt der keüscheyt vnnd armut/ sind nicht ynn arbayt wie andern menschenn/ ßondern/ wie die Engel ym hymel/ loben vnnd dienen sie gott tag vnd nacht Vnnd kurtzlich yr leben ist hymlisch/ so doch keyn grewlicher vnkeüscheyt/ keyn grösser reychtum/ keyn vnandechtiger hertzen/ keyn verstockter volck auff erden ist/ denn yn dem geystlichenn stand/ wie yederman sihet/ noch füren sie alle wellt von der ban auff den nebengang/ mit yrem selb erwelltem schönnen geystlichen englischen leben. Diß alles main ich sey ya nicht von Juden noch von den Manicheer gesagt sondern/ von den Papisten/ das zeygen die werck.

Auffs vierde/ spricht er Er trett eyn her. ynn solcher geystligkeyt/ vnd in dem/ das er nie gesehenn hat Das ist/ das aller ergest an menschen leren vnd leben/ dz es on grund vnd exempel der schrifft get/ Vnnd sie nicht wissen mügen/ was sie thond/ obs gut oder böße sey. Den aller yrer wandel stet auff abenteuer Das wen du sie fragest/ ob sie gewiß seyen/ das ir ding für got genem sey so sprechen sie/ sie wissens nicht/ sie müssens wagen auff eyn abenteur/ geradts/ so geradts/ Vnd müssen das auch also sagen Seytmal sie on glaubenn sind Welcher alleyn vnß gewiß mache/ das alle vnser weßen got gefallet/ nicht aus verdienst/ sondern auß gnadenn Alßo ist all ir demut/ gehorßam/ vnd gantz geystlicheyt wen sie gleych am besten ist/ vngewiß vnd verlorenn.

Auffs funfft/ vmbsonst blaßen sie sich auff/ das ist/ sie habens nicht vrsach/ den ob sie wol vngewiß/ vngleubisch/ vnnd eyttel verdamlich weßen füren/ denocht türffenn sie sich auff blaßen vnd fürgeben yr meßen sey das beste vnd allein der rechte weeg/ das aller ander leben för in stincket vnnd nichs ist/ aber sölchen auffgeblaßen fläyschlichen syn sehen noch empfinden sie nicht/ fur grosser Engelischer demut vnd gehorßam. O der frucht menschlicher lere.

Auffs sechst/ halten sie sich nicht am haubt Christo/ denn es ist vnmüglich/ das menschen lere vnnd Christus sollten eynes sein. Es muß eynes das ander auff hebenn. Tröst sich das gewissen auff Christus/ so muß der trost auff werck vnnd lere fallen/ Tröst sichs auff werck/ so muß Christus fallen. Es mag vnd kan das hertz nicht auff zwayerley grund sich bawen Eyner muß verlassen werden. Nu sehen wir/ das der Papisten gantzer trost auff yrem weßen stet. Denn wo er nicht darauff stunde/ so achten sie seyn nicht/ vnd liessen es faren oder brauchten seyn frey/ wie vnd wen sie wollten.

Wenn nu keyn ander vnglück an menschen leren were/ so were leyder dißes alszu groß/ das man muß Christum drob verlassen/ vnd das haubt verlieren/ vnd das hertz auff solchen grewel bawen Darumb nennet S. Petrus/ die orden/ greulich vnd spricht Es sind secten der verdamnis/ die Christum verleucken. vnd saget yn der andern Epistel ym ander Capitel also Es werden vnder euch komen falsche lerer/ die da nebenn eyn füren werden secte nder verdamnis Vnnd den herrn/ der sie erkaufft hat/ verleucken.

Auffs siebendt/ Ists klar gnug wie er mit den worten vnser geystliche meynet/ da er spricht/ so yr mit Christo gestorben seyt Was lasset yr euch mit satzungen gewissen machenn.

Nemlich das soltu nicht anrüren/ das soltu nicht essen das osltu nicht tragen rc. Wer kan hie leucken/ das gott durch S Paulus verpeut/ alle menschen lere zu leren vnnd zu hören so ferne sie das gewissen nöttigen Welcher kan den nu mit gutem gewissen Ein Münch/ Pfaff oder vnder den Bapst sein Sie müssen ye bekennen/ das yre gewissen/ mit solchen gesetzen gefangen sind Also sihestu/ wol ein mächtiger spruch diß ist. wider alle menschenn lere/ das erschrecklich zu hörenn ist/ das sie Christum das haubt lassen/ den glauben verleucken/ vnd alßo hayden werden müssen/ so sie doch mainen/ die wellt stet auff yrer heyligkayt.

Der sechst ist abermal Paulus/ zu den Galatern am ersten Capitel vnnd spricht

So auch wir selbs/ oder eyn engel vom hymel euch verkündiget vber das/ wir euch verkündiget haben/ das sey eyn bann. Vnnd wie wyr gesagt haben/ so sage ich noch eynmal. So yemand euch verkündiget vber das yr enpfangen habt/ da sey eyn bann.

Hie hörestu eyn vrteyl gottes vber Bapst/ vnd alle menschenlere/ das sie ym bann sind. Nu ist dißer bann/ nicht wie des Bapsts bann Sondern ewig/ vnnd sondert/ von gott/ von Christo/ von aller seligkeyt/ vnnd von allem gut/ vnnd macht des teuffels genoßen O Wie eyn grewlich vrteyl ist das.

Nu sihe/ ob nicht Bapst/ Pfaffen vnd München verkündiget vnnd leren anders vnd vber das von Christo vnnd seinen Aposteln geleret ist/ wie oben gesagt/ dz Christus lerett Was zum mund eynget/ macht den menschen nicht vnrayn Da wider vnnd vber/ spricht Bapst/ Pfaffen vnnd Münch Du leugest Christo/ was du sagest. Denn fleysch essen macht eynen Carthüßer vnreyn vnd verdampt yn/ also auch der orden gleychen Sihe/ heyst das nicht/ stracks Christum ynß maul schlahen/ lügen straffen/ vnd lestern/ vnd anders leren den er geleret hat.

Darumb ist das vrteyl recht/ das sie ewiges bannes/ alß die gotteslesterer/ vervrteyllet vnnd verdampt werden/ inn yrer grossen heyligkeyt.

Der siebendt ist abermal Paulus zu Tito vnd spricht am ersten Capitel.

Lere sie/ das sie nicht achten auff Judische fabeln vnnd menschen gepott/ die ab wenden die warheyt.

Sihe do/ das ist eyn strack gepott/ man solle schlecht nicht achten der menschen gepott Lieber ist das nicht helle gnug.

Vnnd gibt vrsach Sie abwenden die warheytt/ spricht er denn wie auch obenn ist gesagt. Eyn hertz kann nicht zugleych auff Christum sich verlassen vnnd auff menschenleren oder werck. Darumb so bald man auff menschen lere fellet so wendet man sich von der warhayt vnnd acht yr nicht Widerumb wer auff Christum sich tröstet/ der kan menschen gepott vnd werck nicht achten.

Nu sihe zu/ welchenn bann du am meysten fürchten sollt Der Bapst vnnd die seynen werffen dich fern hynder die hell so du yr gepott nicht achtest. Vnnd Christus gepuet dir/ Du sollt sie nicht achten/ bey seynem bann/ dencke nu welchem du folgen willt.

Der acht ist Petrus/ yn der andern Epistel am andern Capitel vnnd spricht.

Es werden falsche lerer vnder euch komen/ die da neben eynfüren secten der verdamnis. Vnnd den herrn der sie erkaufft hat verleucken/ durch welche der weg der warhayt wirt verlestertt werden. Vnnd mit erdichten worten durch geytz werden sie vmb euch handtieren.

Sihe da/ die orden vnnd stifft sind secten der verdamnis/ woher da her/ das sie Christum verleucken/ vnnd verlestern den weg des glaubens Womit damit/ Christus spricht Es sey kein sünd noch gerechtigkeyt/ in essn trincken kleyden stetten vnd menschen wercken. Das straffen sie/ leren vnd leben/ es sey sünd vnnd gerechtigkeyt darinen/ so muß Christus liegen/ verleucket vnd verlestertt sein/ mit seyner lere vnd glauben.

Noch gend/ sie mit ertichten worten vmb/ vnnd geben gehorßam/ keüscheyt/ gottes dienst für aber nur auß geytz damit sie vmb vns handtiren. biß das sie aller wellt güter zu sich bracht habenn/ alßo die da yederman gen hymel mit yrem gottes dienst helffenn wöllen. Darumb sind es vnnd bleyben secten der verdamnis vnnd gottes lesterung.

Der neunde ist abermal Christus Mathei am vier vnd zwentzigsten vnnd spricht.

So euch denn yemand wirt sagen Sihe hie ist Christus/ oder hie/ so glaubt nicht/ Denn es werden auffsteen falsch Christen vnnd falsche Profheten/ vnnd geben grosse zeychen vnd wunder/ das auch/ so es müglich ist/ die uaßerweleten yrren werden Sehet da ich habs euch zu vor gesagt Wenn sie nun zu euch sagen Sihe da/ er ist ynn der wüsten/ so geet nicht hynauß Sihe da/ yn den kellern/ so glaubts nicht.

Sage/ wie kan eyn Münch selig werden.

Er bindet ye seine selikayt an eyne stett/ vnnd spricht. hie ist mir Christus/ wenn ich hie nicht blibe/ so were ich verlorenn. Christus aberspricht neyn/ ich bin nicht hie/ Wer wil die beyde eyns machen. Darumb ists klar/ auß disem wort Christi/ das alle lere/ die das gewissen an stete binden/ sind wider Christum Last er aber das gewissenn nicht ann stette binden/ so last ers auch nicht an speyß/ kleyder/ geperde vnd alles eußerlich binden Das keyn zweyffel ist/ Dißer spruch rede vom Bapst vnd seinen geystlichen Vnd Christus selbs hie absoluirt vnd eußeret alle Pfaffen/ vnd Münch/ yn dem/ das er verdampt alle orden vnd klöster Vnd spricht Glaubt nicht/ get nicht hyn rc.

Eben die meynung saget er auch Luce am siebentzehenden Das reych gottes/ kompt nicht mit eußerlichen geperden. Vnd man wirt nicht sagenn Sihe/ hie ists/ Sihe da ists. Denne sehet da/ das reych gottes ist ynwendig ynn euch. Ist dz nicht auch klar gnug. Nu künden ye menschen lere nichts anders/ denn eußerlich ding orden/ weyl denn gotes reych nicht eußerlich ding ist/ so müssenn sie seyn felenn/ vnnd yrren/ bayde lerer vnnd schüler.

Es hilffts sie auch nichts/ das sie sagen Heylige Veter haben die orden gefüret. Denn Christus hatt den behelff schonn vmb stossen/ die weyll er spricht. Die außerweleten möchtenn verfüret werdenn/ das ist/ sie werden yrren/ aber nicht drinnen bleyben. Was were es sonst für ayn sonder groß yrthum. Wenn die außerweleten nicht yrreten/ Es sey nu der heyligen lere vnnd exempell wie es sey/ so sind Christus wortt gewiß vnd klar. Dem müssen wir folgen/ vnnd nicht dem heyligenn der elre vnd werck vngewiß sind/ Es stet fest/ Das erspricht Das reych gottes stehet hynnen euch/ vnd nicht eußer euch hie oder da.

Der zehend ist Salomon am Dreyssigisten in seynen sprüchen.

Alle wort gottes sind durchfewret/ vnd eyn schildt allen/ Die drauff sich vertrösten. Setze nichs zu seynen wortten/ auff das er dich nicht straffe/ vnd werdest lügenhafftig erfunden.

Das sey der beschluß auff diß mal/ Den es ist noch vill mer yn den Profpheten Sonderlich yn Jeremie. Dauon ich yn der beycht geschriben So schleust hie Salomon/ das er eyn lügenhafftiger ist Der etwas zu setzt den wortten gottes Denn es soll nur gotes wort vnß leren Wie Christu spricht Mathei am drey vnnd zwentzigsten.

Last euch nicht mayster Heyssen. Ein mayster ist in euch Christu.

Amen da bleybs bey.

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/l/luther/v/von_menschenlehre_zu_meiden.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain