1519

Allen die diessen brieff sehen/ hören/ und lessen/ Empeut ich Martinus Luther Augustiner zu Wittenbergk meyn unterthenigen dienst uñ armss gepeet.

Es ist fur mich kummen/ wie das etliche menschen meyne schrifft/ sunderlich/ die ich mit den gelerten/ nah der scherffe gehandelt/ dem eynfeltigen volck felschlich/ eynbilden/ unnd mich yn etlichen artickeln vordechtig machen/ das auch ethlich sonst ym glauben bawfellig durch sulche eynbildung vorursacht/ schimpflich reden von der lieben heyligen furbit/ vom fegfeur/ vô gutê wercken/ fasten/ beten/ etc.

Von der Romischen kirchenn gewalt/ alss solt das alles nichts seynn/ Derhalben ich/ so vill myr müglich/ den selbigen schedlichenn zungen begegen uñ mich vorcleren muss. Bitt eyn iglich frum Christen mensch/ wolt mich recht vornehmen/ und den selbê meynen ungepeten dolmetschern/ nit mehr dan mir selbs glauben.

Sag ich und halt fest mit der ganzen Christenheyt/ das man die lieben heyligen eeren anruffen sol/ Dan wer mag doch das widderfechtê/ das noch heuttigis tagis/ sichtlich/ bey der lieben heyligen corper und greber/ got durch seyner heyligen namen wunder thut?

Das ist aber war/ uñ habs gesagt/ es sey nit Christenlich/ das man geystliche noddurfft nit mehr ader vlyssiger/ dan die leypliche/ bey den lieben heyligen sucht.

Wa fyndt mâ itzt eynen heyligê/ der umb gedult/ glauben/ liebe/ keuscheyt uñ ander geystliche guttere/ wirt angeruffen als sant Anna/ umb reychtûb/ Sant Lorens vor das fewr/ Der umb eyn pöse peyn/ der umb ditz/ der ander umb das/ Nit das alss zu vorwerffen sey/ sunder das eyn Christen mensch die geystlichê mehr achtê solt dan die guter/ die er sicht auch den tirern/ und heyden gemeyn/

Daruber seynd etlich sso nerrisch/ das sie meynen die heyligen haben eyne macht/ adder gewalt/ sulchs zu thun/ Sso sie doch nur forbitter seynd.

Und alles durch got alleyn gethan wirt. Darumb sol man sie sso anruffen/ und eeren/ das man got durch sie anruffe und eere/ wie s 131. Memento domine Dauid/ gedenck got an Dauid/ uñ aller seyner sanfftmutigkeyt. Alsso auch Moses/ vor got anzceugt. Abraham/ Isaac und Jacob/ uñ die christliche kircke in yhren gepeten das selb gar wol leret.

Sol man fest glauben/ und ich weyss das war ist/ das die armen seelen unsegliche peyn leyden/ und mâ yhn helffen schuldig ist/ mit Beeten/ faste/ almossen uñ was man vormag. Was aber die peyn von art sey und ob sie alleyn zur gnugthuung adder auch zur besserunge diene/ weyss ich nit/ unnd sag noch das das niemant gnugsam weyss. Drumb solt man das got befelen und nit claffen und auffschreyn alss were man desselben gewiss. Uns ist nit mehr befolen/ dan yhn zu helffen/ got wils alleyn wyssen wie er mit yhn handelt.

Auch das man mit ablass/ ynss fegfeur rauschen wil unnd alsso mit gewalt/ in gottes heymlich gericht fallen/ hab ich nit wyssen/ uñ noch nit weyss zuerhaltê adder zubeweren/ glaubs wer do wil/ ich wils nit glauben/ Es werd dan bass beweysset/ dar durch hab ich/ ob got wil/ das fegfeur/ nit vorleugnet.

Ist gnug eynem geneynem man zu wyssen/ das ablass sey entledigung der gnugthuung fur die sunde/ Sso doch das es gar vil geringer ist/ dañ gutte werck seynn gepotenn unnd wyr schuldig zuthun/

Ablas ist frey uñ wilkörig/ sundiget niemant/ der es nit losset/ vordienet auch nichts der es losset. Darumb sso yemant eynen armen menschen nit gibt/ adder seynem nehsten nit hilfft/ und doch meynet ablass zu lossen/ thut nit anders/ dan das er got und sich selb spott. Er thut das nit/ das got gepoten hat/ uñ thut/ das ym niemât gepoten hat. Was mehr von ablas zu wyssen ist/ sol man den gelerten yn den schulen lassen/ und an dissen vor stand sich gnugen lassen.

Gottes gepot sol man uber der kirchen gepot achten/ wie das golt und edel gesteyn uber das holtz uñ stroo/ alss der Apostel lautet. 1. Co: 3. Und sol yhe keynes vorachten.

Drumb wan du sichst/ das eyner schweret/ flucht affterredt adder seynen negsten nit hilfft/ sso soltu gedencken unnd wyssen das der selb vil erger ist/ dan der fleysch am freytag isset/ aber die gepoten fasten bricht.

Da durch hab ich antzweyfel/ gute werck nit widder radten/ Sundernn die rechtenn gutenn werck denn geringern furzogen. Alsso hab ich gesagt/ das eyn grosse vorkerûge itzt in der welt ist/ das mâ gottis gepot gâtz vorachtet/ Und die weyl sich mit menschlichen rechten und wercken deckt/ unnd nu den Pabst und seyne wort/ weyt mehr furcht dan got und gottis wort.

Und wan ich das sage/ sso spicht mâ/ ich widderstrebe dê Pabst unnd geystlichen gerecht/ wollen aber nit hören/ das sie got selb und seynen gerecht unverschampt widderstrebê/

Sicht mâ eynen eebrecher/ reuber/ lugner/ sso ist es nichts sunderlich so er eyn kostlich pater noster tragen kan/ eyn eygen willige fasten halten/ adder etwan eyn besondern heyligen eert.

Sso aber yemant fleysch esse am freytag adder den heyligen tag nit feyret/ adder sonst eyn kircken gepot nit helt/ der muss erger seyn dan eyn heyde/ wan er gleych todtê auffwecken kund/ alsso hubsch gleissen die gepot und werck der menschen/ gottis gepot/ und gottis werck/ sicht mann durch eynenn finster nebel an.

Drumb sag ich noch/ man sol beyderley gepot halten/ doch mit grossem vleys unter scheydë/ dan obschon keyn gepot der kirchen were/ Kund man doch wol frum seyn/ durch gottis gepot.

Wan aber gottis gepot nach bleybt/ sso ist der kirckê gepot nit anders/ dan eyn schedlicher schand deckel/ und macht aussen eyn guten scheyn do inwendig nichts guts ist.

Der halben ist auch meyn rad/ das mann der kirchen gepot eyns teyls ablegt yn eynen Concilio/ auff das man gottis gepot auch eynn mal scheynen und leuchten liess/ dan mit den lichten vieler gepot/ hat man dem tag gotlichs gepots/ gar nah/ die augen auss gelaucht.

Hab ich gesagt/ und sage noch/ das niemant kan frum seyn/ unnd wol thun/ es mach yhn den gottis gnaden zuuor frum/ uñ durch werck/ niemât frum wirt Sundern gute werck geschehn allein/ durch dê/ der frum ist/ gleych wie die fruchte machen nit den Baum/ Sundern der baum brengt die frucht.

Und als Christus sagt eyn böser baum bringt nymer eyne gute frucht/ der halben alle werck/ wie gut sie seynd/ wie hübsch das sie gleyssen/ so sie nit auss gnadê fliessen/ seynd sie umbsunst/ nit gantz umbsunst dan die guten werck die ausser der gnaden gottis geschehn/ belonet gott zeythlich mit reychtûb (W72)/ eere/ sterck gewalt/ freud/ frûtschafft/ kunst/ vorstâd etc. Aber das ewige leben erlangen sie nit.

Das alles hab ich geprediget/ widder die/ die allein des eussern wercks scheyn angesehen/ das gut nennen/ das gar offt pöss ist vor gott/ dan gott nah dem hertzen nit nah dem scheyn der wercken richtet/

Das ist sso vill gesagt/ Gott will/ das wir an uns soln vorzweyfelñ/ und an allen unserm leben uñ wercken/ auff das wir erkennen/ das wir mit allen unserm leben uñ wercken/ vor seynen augen nit mugen bestehn/ sundernñ alleyn auff seyne grundloss gnade uñ barmhertzickeyt uns vortrosten/ uñ alsso ynfurchten wandelñ/ und unssers guten lebens zuuorsicht fallen lassen.

Sich die werck/ uñ das leben/ die auss solchen forchtsamen demutigen hertzen geschehn/ seynd gut/ und nit die/ die ausswendig scheynen gut/ wie gross/ vill/ wunderlich sie seynd/ an solchen grund und meynûg geschehn/

Das wil der spruch des psalters. Beneplacitû est dño etc. Got hatt eyn hertzlichs wolgefallen an den/ die sich vor yhm furchten/ uñ doch auff seyne barmhertzickeyt sich vorlassen.

Dann aber furcht man sich/ wan man erkennet/ das wir fur seynê gericht nit bestehen mügen/ und darumb vom gericht zur gnaden thron fligen/ mit Dauid sprechen. Herr gott handel nit mit gericht/ gegen deynem diener/ dan es mag keyn lebendig mensch recht erfundê werdê/ fur deynen augen.

Altsso widderumb eyn missfallen hat an den/ die sich sicher wissen/ uñ auff yhre gute werck pochen. Sich die selben freyen/ sichere/ hoffertige gute werck hab ich vorworffen/ auff das ich (wie die schrifft) leret/ das die forcht gottis sey das haupt gut uñ gantzes wessen/ eyns weyssen frumen menschen/ uñ alle weyssheyt unnd gute werck/ dan rechtschaffen seynd/ wan mâ sich yn den selben vor gott furcht/ uñ seyner gnaden begeret/ das heyst principiû sapientie timor dñi/ die forcht gottis ist das heubt uñ ganz vormügen aller weyssheyt uñ frumkeyt.

Nu merck/ ob ich gute werck vorpoten habe adder nit/ dañ die forcht gottis/ ist eyne gnade gottis/ uñ hatt sie niemant von yhm selber/ darumb seynd alle gutte werck posse werck/ wo die gnade uñ forcht nit ist.

Das die Romischen kirchen von gott/ fur allen andern geeret sey/ ist keyn zweyfell/ dañ doselb Sanct Peter uñ Paul/ xlvi. bebsie/ darzu vill hûdert tausent martyrer yhr blut vorgossen/ die hell unnd welt ubirwunden/ das man wol greyfen mag/ wie gar eynen besonderñ augen blick/ got auff dieselb kirchen habe.

Ob nu leyder es zu Rom alsso steht/ das woll besser tuchte/ sso ist doch die/ uñ keyn ursach sso gross/ noch werden mag/ das mâ sich von der selben kirchen/ reyssen adder scheydenn soll/

Ja yhe ubeler es do zugeht/ yhe mehr man zulauffen uñ anhangen soll/ danñ durch abreyssen adder vorachten wirt es nit besser. Auch soll man gott umbs teuffels willen nit lassen/ noch (W75) die ubrigen frumen/ umb dess bossen hauffen willê meyden/

Ja umb keynerley sund ader ubel/ das man gedencken ader nennen mag/ die lieb zurtrennen/ und die geystliche eynickeyt teylen/ dan die lieb vormag alle dinck/ uñ d' eynickeyt ist nichts zu schwer/ Es ist eyne schlechte lieb unnd eynickeyt/ die sich lesst frembde sunde zurteylen.

Was aber die gewalt uñ ubirkeyt Romisches stuels vormag/ uñ wie ferne sich dieselb streckt/ lass die gelerten aussfechtê/ dan/ daran der seelen selyckeyt gar nichts gelegen/ und Christus seyne kircke/ nit auff die eusserliche/ scheynbare gewalt unnd ubirkeyt/ adder eynige zeitliche dingk/ die der welt/ uñ weltlichen gelassen ist/ sunder yn die inwendige lieb/ demut/ und eynickeyt gesetzt un gegrûdet hatt.

Darûb die gewalt/ sey wie sie sey/ gross ader cleynn/ gantz ubir all/ adder eyns teyls/ soll sie uns gefallen/ uñ wir zu fridê seyn/ wie sie got aussteylet/ gleich wie wir zufriden seyn sollen/ wie er ander zeytliche guter/ eere/ reychtumb/ gunst/ kunst/ etc. aussteylet/ alleyn der eynickeyt soln wir achten nemen/ und bey leyb nit widder streben Bepstlichen gepoten.

Sihe nu hoff ich/ es sey offenbar/ das ich der Romischen kirchen nichts nemen will/ wie mich meyne lieben frund schelten/ das ich myr aber/ etliche heuchler nit gefallen lasse/ dûckt mich ich thu recht daran/ und solle mich nit vor wasserblassen zu todt furchtê/ dem heyligê Romischen stuel/ soll man yn allen dingen folgen/ doch keynem heuchler nymer gleuben.

Quelle: Irmischer, Dr. Johann Konrad - Dr. Martin Luther's reformations-historische deutsche Schriften, Band 1