Erb, Matthias - Catechismus und Underweisung christenlichs Glaubens

Erb, Matthias - Catechismus und Underweisung christenlichs Glaubens

in deß Hochgebornen Herren/ Herren Georgen/ Graue zu Würtemberg/ vnd zu Mümpelgart/ rc. Graffschafft Harburg/ vnd Herrschafft Reichenwyler/ der Jugend zu dienst vnd gutem beschriben.

Vorrede

Den Kindern Christi der Graffschafft Harburg/ vnd Herrschafft Reichenwyler/ gnad vnd frid von Gott dem Vatter.

GEliebte kinder im Herrn/ eüwer eyffer vnnd ernst/ auch vnsers dienstes mühe vnd arbeyt ist (Gott hab lob) wol erschossen. Dann nach dem wir in den vier schulen/ auch sunst in der Kirchen/ bißher den allen kurtzesten Catechismus gebraucht/ haben jr den selbigen so hertzlichen gefasset/ vnd außwendig gelernet/ daß wir vor langest/ eüwer gehorsamkeit pflichtig weren gesein/ ettwas weyter hinein zu füren/ in die geheimnuß des reichs Gottes. Dieweil aber die fernderig pestilentz/ auch andere schwere kranckheiten/ kriegsläuff/ vnnd andere geschäfft/ solchs bißher gehindert/ haben wir solchs jetzund wöllen leisten/ vnd den auff das besserlichst gemeret/ in truck geben/ auff daß nit allein die/ so in der schul (welchen doch nützlicher wer/ selbs schriben) solchen on arbeit haben/ sunder vil mehr denen/ so von der schul zur handarbeyt angestellt/ vnd nit müssig zu schriben/ auch den haußuättern so lesen künden/ mögen bekummen. Andern kirchen Christi/ deren vil in Teütschlandt seind/ auch andern Catechismis/ die dann höher seind dann der vnser/ haben wir disen on verachtung/ nach gelegenheit vnsers Elsessischen gepirgs/ vnd kirchen geordnet/ den man zum jar zwelffmal gentzlichen mag Examinieren vnnd verhören/ Dan allen monat gat er auß/ rc. Hiemit seind dem lieben Got im himmel/ vnnd dem heilandt Jesu Christo befolhen/ der die kinder hat heissen zu jm kummen. Lassen eüch lieben kindt/ die arbeit nit thuren zu lernen den weg Gottes/ vnd die ersten schulrecht vnsers glauben/ es wirt zu seiner zeit frucht bringen/ als sich dann erschinen hatt/ mit eüweren vorfaren vnd schulgesellen/ welche Gott fernd hingezuckt/ vnnd sie an jrem letsten abscheid/ mit Christenlichem erseüfftzen/ ernstigem gebett/ festem glauben/ ja auch alle mal mit lobgesang/ vnd Psalmen singen/ das wol Cygneacantio ist/ jren geist in die hendt des himmelischen vatters fleissig befolhen haben/ daß doch vil hohen Doctoren/ Sophisten/ Fürsten/ vnd Herren/ vor zeiten überbliben ist. Der geyst Christi geleit eüch in alle warheit.

Die diener des worts der Graffschafft Harburg vnnd Herrschafft Reichenwyler.

Georg/ Graue zu Würtemberg/ vnd Mümpelgart/rc.

IR berufften vnd geordneten der außspendung des Worts Gottes in vnser graueschafft Harburg/ vnd Herrschafft Reichenweiler/ Wir wünschen euch/ daß der Herr wölle gnad geben/ daß jr dasselbig zu nutz mit Christlichem eyfer/ gesunder leer vnd ewiger frucht/ volbringen mögen/ Amen.

Wir haben den zugeschickten Catechismum/ sampt der vnderweisung vnd leerung/ rc. so in yetziger vnserer oberkeyt/ diser zeit für die Jugent zu gebrauchen ist/ durchsehen vnnd gelesen/ wölt also durch den truck zuuolenden mitt fürtgon/ denn gnedigen Gott von hertzen anruffend/ vnd bittend/ daß zu Eer/ lob/ preiß/ vnd aufferbawung seins heyligen worts/ zu nutz/ heyl/ vnnd warem bestendigem glauben vilder seelen dienen mögen/ Amen. Actum den 10 Tebruarij/ Anno M. D. XLIII.

Vnseren Predicanten vnd diensern des worts/ inn vnser graueschafft Harburg vnnd herrschafft Reichenwyler.

Das Vatter vnser.

Matthei VI. cap.

VAtter vnser der du bist in den himmlen/ Geheyliget werde dein namm/ Zu kumme dein reich/ Dein will geschehe auff erden/ wie im himmel/ Vnser täglich brott gib vns heüt/ Vnd vergib vns vnser schuldt/ wie wir vergebend vnseren schulderen/ Nitt für vnns in versuchnüß/ Sonder erlöß vnns von dem bösen/ Dann dein ist das reich/ vnd die krafft vnd die herlicheit ewiglichen. Amen.

Der Christenlich Glaub.

ICh glaub in einen Gott/ vatter den almechtigen/ schöpffer himmels vnd der erden/ Vnd in Jesum Christum seinen einigen sun vnseren HERREN/ Der entpfangen ist vom Heyligen geist/ Geboren auß Maria der jungfrawen/ Der gelitten hatt vnder Pontio Pilato/ Er ist gecreütziget/ gestorben/ vnd begraben/ Abgefaren zu den Hellen/ Am dritten tag wider erstanden von den todten/ Auffgefaren zu den himmlen/ da sitzt er zur gerechten Gott des vatters/ des allmechtigen/ Dannen er künfftig ist zurichten die lebendigen vnd die todten. Ich glaub in den heyligen geist/ Eine heylige gmeyne Christenliche kirchen/ gemeinschafft der heyligen/ Ablaß der sünden/ Aufferstendtnuß des fleyschs/ Vnnd eyn ewigs leben/ Amen.

Die gebott Gottes/

im andern buch Mose/ am XX.

Das erst gebott.

ICh bin der HERR dein Gott/ der dich auß Egypten/ auß dem diensthauß gefürt hab.
Du solt kein andere noch frembde Götter vor mir haben.

Das ander gebott.

Du solt dir keyn graben oder geschnitz bild machen/ ja gar kein bildtnüß noch gleichnuß/ weder deren dingen die im himmel da oben/ noch deren/ die vnden auff erden sein/ noch deren die in wasseren seind vnder der erden/ du solt dich vor jnen nit bucken/ du solt jnen nit dienen/ sie weder ehren noch anbetten. Dann ich bin der HERR dein Gott ein starcker eyferer/ Ich straff die boßheit der vättern an den kinden biß ins dritt vnd vierdt geschlächt/ so sie mich hassend/ Barmhertzigkeit aber vnnd freüntschafft beweiß ich biß in die tausende/ so sie mich liebend/ vnd meine gebott haltend.

Das dritt gebott.

Du solt den nammen des HERREN deines Gotts nitt leichtfertig/ oder üppiglich nemmen/ Dann der HERR wirt den nitt vnschuldig halten/ der seinen nammen leichtfertig nimpt.

Das vierd gebott.

Gedenck des Sabbath tags/ daß du jn heyligest/ Sechß tag soltu arbeiten/ vnd alle deine werck schaffen/ Aber am sibenden tage/ ist der Sabbath des HERREN deines Gottes/ an dem solt du kein werck thun/ weder dein sun/ noch deine töchteren/ weder deine knecht/ noch deine mägt/ noch dein vych/ noch der frembdling der in deiner stat thor wonet. Dann sechß tag hat der HERR himmel vnd erden gemacht/ vnd das meer/ vnnd alles waß darinnen ist/ Aber am sibenden tag hatt er geruwet von aller arbeit/ deßhalb hatt der HERR den Sabbath gefreyet vnnd geheyliget.

Das fünfft gebott.

Du solt dein vatter vnd muter inn hohen eeren halten/ auff daß du lang lebest im land daß dir der HERR dein Gott geben wirt.

Das sechst gebott.

Du solt nit tödten.

Das sibend gebott.

Du solt nit Eebrechen.

Das achtest gebott.

Du solt nit stälen.

Das neünd gebott.

Du solt nitt falsche zeügnuß geben wider deinen nechsten.

Das zehend gebott.

Du solt nit begeren deines nechsten hauß/ du solt nit begeren deines nechsten weibs/ knecht/ magt/ vych/ oder alles waß dein nechster hatt.

Dieweil der Glaub ein anfang des heyls/ vnd die thür ist zu der waren erkantnuß Gottes/ so ist das erst theil vnd fragstuck von Christenlichem glauben

Frag. MEin liebs kind sag an/ was glaubst du doch?
Antwort. Ich glaub in einen Gott vatter den almechtigen/ schöpffer himmels vnd der erden/ Vnd in Jesum Christum/ rc. garauß.

Frag. Welches ist das erst pünctlin?
Antwort. Ich glaub in Gott vatter den almechtigen/ schöpffer himmels vnnd der erden.

Frag. Wa von lautet der selbig?
Antwort. Von der erschöpffung.

Frag. Was bekennen wir mitt dem selbigen?
Antwort. Wir bekennen daß der eintzig ewig vnd Almechtig Gott/ mit seiner Almechtigen krafft/ alle geschöppfft im himmel vnd auff erden gemacht hat/ welche er auch ewiglich behaltet/ vnd beherrschet/ nach dem wolgefallen seines willens.

Frag. Welches ist der ander artickel?
Antwort. Vnd inn Jesum Christum seinen einigen Sun vnsern HERREN/ der entpfangen ist vom Heyligen geyst/ geboren auß Maria der Jungfrauwen/ rc.

Frag. Wa vonn lautett der ander punct?
Antwort. Von der Erlösung.

Frag. Was bekennen wir mitt dem selbigen?
Antwort. Wir bekennen vnns vngehorsame vnnd verdampte geschöpfft Gottes gewesen sein/ vnd daß Gott darumb Jesum Christum/ waren Gott vnnd menschen/ von himmel herab geschickt hatt/ vnd von der reinen Jungfrauwen Maria lassen geboren werden/ daß er mitt seinem heyligen blut vns reiniget/ vnnd mit seinem vnschuldigen todt vns dz ewig leben schanckte/ auch mitt seiner aufferstehung vnns rechtfertiget/ vnd jetzund sitzend bey Gott/ vns fürspreche/ vnd vnser mitler were/ biß an der welt end/ da er ein richter wirt sein der gerechten vnd vngerechten.

Frag. Welches ist der dritt punct?
Antwort. Ich glaub in den heyligen geist/ ein heylige/ rc.

Frag. Wa von lautet der dritt punct?
Antwort. Von der krafft des heyligen geists vnd seiner heyligmachung.

Frag. Vnd was bekennen wir mit dem selbigen?
Antwort. Wir bekennen/ daß Christus die salbung/ vnd innerung Gott des heyligen geists/ den kinderen Gottes versprochen/ so in der Christenlichen gemeindt versamlet seind/ denen er auch verzeyhung der sünden/ so glauben vnnd sich bessern/ durch den heyligen Tauff/ vnnd das Nachtmall/ vnnd durch das Wort Gottes verspricht vnnd erinneret/ vnnd leeret sie auch die ware aufferstehung dises fleischs/ vnnd das die Gläubigen ewig mitt Christo leben/ die vngläubigen aber/ mitt dem ewigen zorn Gottes überschüttet werden.

Frag. Was nutz bringt dir diser glaub?
Antwort. Disen nutz bringt er mir/ daß ich durch den glauben/ von wegen Jesu Christi/ für Gottes gericht frumm vnd gerecht geurteilt/ vnd mitt dem heyligen geist begabtwürd/ daß ich zu Gott bitten darff/ vnd jn als ein vatter anruffen/ vnd mein leben nach synen gebotten anrichten/ vnnd gutte werck thun möge.

Das ander teil - Vom gebett Christi.

Frag. Wie bettet man, liebes kindt?
Antwort. Wie vns vnser HERR Jesus Christus gelernet hatt/ Vatter vnser der du bist in den himmlen/ rc.

Frag. Warumb spristu Vatter?
Antwort. Darumb daß er allein ein getreüwer vatter/ allein gnedig ist/ vnd will daß wir seine kinder seyen.

Frag. Was bedeüt das wörtlin/ Vnser?
Antwort. Das ist so vil/ Du bist nitt allein mein gnädiger vatter/ sonder auch deren/ die mitt mir auff Christum getaufft seind/ für die ich auch bitte.

Frag. Was vermag das wörtlein/ Inn den himmlen?
Antwort. Das ist/ Ich beken/ dz du ein eintziger schöpffer bist aller Creaturen inn himmlen vnd auff erden/ vnd ich hie auff erden vom himlischen vatterland verstossen/ beger zu dir inn die himmlen.

Frag. Welches ist die erste bitt?
Antwort. Geheyliget werde deinn Namm. Das ist/ wir begeren dich allein zu preisen vnnd anzuruffen/ deß namm allein heylig ist.

Frag. Wie heißt die ander bitt?
Antwort. Zukumme dein reich. Das ist/ nitt das reich von diser welt/ sonder inn dem du herrschest/ mitt deinem ewigen wort/ glauben vnnd liebe/ vnnd allen geystlichen gaben.

Frag. Wie heißt die dritte bitt?
Antwort. Dein will geschehe/ auff erden wie im himmel. Das ist/ gib vns gnad/ daß wir deine gebott williglichen hie auff erden mitt himlicher weiß vnd art erstatten.

Frag. Wie heißt die vierdte bitt?
Antwort. Vnser täglich brott gib vns heüt. Das ist/ gib vns alzeit verstand deines Euangelions/ vnnd Göttlichen worts/ Speise vnns auch leiblichen/ behüt vns vor gottloser sorg der narung.

Frag. Wie heißt die fünffte bitt?
Antwort. Vnd vergib vns vnsere Schuld/ wie wir vergebenn vnsern schldneren. Das ist/ verzeihe vnns vnsere sünd vnd missethat/ vnd gib vns die gnad/ daß wir von hertzen mögen verzeihen allen so vnns beleidigen.

Frag. Wie heißt die sechste bitt?
Antwort. Nit für vns in versuchnuß. Dz ist/ laß vns nit verderben in anfechtung des fleichs/ der sünden/ vnd der welt.

Frag. Wie heißt die sibent bitt?
Antwort. Sunder erlöß vns von dem bösen. Das ist/ von dem teüffel der vnns in alle böse laster/ vnd schädliche gfarlicheit vnderstat zu werffen.

Frag. Wie heißt der beschluß?
Antwort. Dann dein ist das reich/ vnnd die krafft vnd die herrlicheit ewiglichen. Das ist/ ich bekenn daß du allein gewaltig/ allzeit starck vnnd herrlich gnug bist/ so wir solchs suchen/ durch Jesum Christum vns zu geben.

Frag. Was bedeut das wörtlein Amen?
Antwort. Das ist/ Ich glaub du habst mich meiner bitt schon gewäret/ vnnd nach deinem vetterlichen willen fürsehung gethon.

Frag. Mitt was sitten/ vnnd gstalt leert vns Christus betten?
Antwort. Matthei am sechsten spricht er/ Wenn jr bättend/ sollent jr nitt vil geschwätz machen/ wie die Heiden/ dann sie meinent sie werden erhört/ wann sie vil wort machen. Johannis am vierden/ Die varhafften anbetter/ werden den Vatter anbetten im geist vnnd in der warheit/ Johannis am vierzehenden/ So jr ettwas werdent den Vatter in meinem namen bitten/ das will ich thun/ rc.

Das dritt teil. Von denn heyligen gebotten Gottes.

Frag. Welches seind die gebott Gottes/ die er Mosi in steine tafflen geschriben hatt?
Antwort. Ich bin der HERR dein Gott/ der dich auß Eqypten/ rc.

Frag. Wie heißt das erst gebott?
Antwort. Ich binn der HERR dein Got/ der dich auß Egypten/ auß dem diensthauß gefürt hab/ Du solt kein andere noch frembde Götter vor mir haben. Das ist/ du solt Gott deinem herren/ dich gantz ergeben vnd vertrauwen/ in über alle ding lieben vnd förchten/ vnd alle hilff vnd seligkeit zu leib vnd seel bey im allein suchen.

Frag. Wie heißt das ander gebott?
Antwort. Du solt dir kein graben/ oder geschnitzte bild machen/ ja gar kein bildnuß/ rc. Das ist/ du solt Got/ der daß ewig vnsichtbar gutt ist/ inn keinem leiblichen ding abbilden/ auch keine seiner Creaturen/ die selbigen anzubetten/ oder göttliche eer beweisen/ oder hilff vnnd seligkeit bey inen zusuchen/ dann Gott wils hoch straffen/ Es verbeütet Gott die bilderen so vereeret werden/ als der Eer Gottes abbrüchig/ vnd vnserem glauben schädlich.

Frag. Wie heißt das dritt gebott?
Antwort. Du solt den nammen des HERREN deines Gotts nitt leichtfertig/ oder üppiglichen nemmen. Das ist/ du solt Gott nitt lesteren/ nit fluchen/ oder mitt zaubereyen vmbgeen/ sunder Gott mitt seinem heyligen wort hoch achten vnd preisen.

Frag. Wie heyßt das vierdt gebott?
Antwort. Gedenck des Sabbaths/ daß du jn heiligest/ vnnd feirest. Das ist/ wir sollen ewigklich vonn sünden feiren/ vnnd vmb besserung willen/ auff bestimpte zeit/ Gottes wort mitt ernst hören/ Deßgleichen sein heilige puntzeychen bey der gemeyn Gottes begon.

Frag. Wie heißt das fünfft gebott?
Antwort. Du solt dein vatter vnd muter in hohen ehren halten. Das ist/ du solt yederman gehorsam sein/ nach Gottes befelch/ de3inen Elteren/ OBerkeiten/ Zuchtmeistern/ ja allen Christen so vns mit treüwen manen.

Frag. Wie heißt das sechßt gebott?
Antwort. Du solt nit tödten. Das ist/ du solt deinem nächsten sein leben on Gottes befelch nit nemmen/ noch entleiben/ noch hassen/ seinen guten lymat nitt verargen/ sonder jm alles guts beweisen.

Frag. Wie heißt das sibend gebott?
Antwort. Du solt nitt Eebrechen. Das ist/ Du solt dich halten in deinem beruff nach Gottes befelch/ vndalle vnkeüscheit an leib vnd seel vermeiden.

Frag. Wie heißt das acht gebott?
Antwort. Du solt nitt stälen. Das ist/ du solt niemands ettwas mit vnbillicher weiß entfrembden oder verforteilen/ sonder yederman/ so vil dir müglich/ guts thun.

Frag. Wie heißt das neündt gebott?
Antwort. Du solt kein falsche zeügknüß geben wider deinen nächsten. Das ist/ du solt deinen bruder nitt vnbillichen verliegen/ sonder jhm zu aller warheit verhelffen/ vnd erhalten.

Frag. Wie heißt das zehend gebott?
Antwort. Du solt nitt begeren deines nächsten hauß/ Du solt nitt begeren deines nächsten wiebs/ kknecht/ magt/ rc. Das ist/ du solt nitt allein mit eüsserlichen sitten vnnd geberden deinem nächsten guts erzeigen/ sonder auch von hertzen schützen vnnd schirmen/ vnd alles so jm Gott gesegnet/ vnnd damitt er begabet/ auch hertzlichen günnen.

Frag. Warzu seind vns die gebott Gottes geben?
Antwort. Zum ersten darzu/ daß wir leren darauß vnsere sünde vor Gott erkennen. Zum anderen/ daß wir leren gute werck thun/ vnnd ein göllich leben füren.

Frag. Künnen wir auch die gebott Gottes/ volkummenlich mitt vnsern guten wercken erfüllen?
Antwort. Nein/ dann vnsere gute werck/ seind von wegen der sünden/ darinn wir entpfangen vnd geboren seind/ nitt gantz volkummen gutt. Aber Gott der Vatter hatt vnns seinen Sun JEsum Christum/ der nie kein sünd gethon/ vnd alle gebot Gottes volkummen erfült/ zum eigenthumb geschenkt/ so wir an denn selbigen glauben/ halt vns Gott auß gnaden vnd barmhertzigkeit von wegen Jesu Christi darfür/ als hetten wir selbs alle seine gebott erfüllet.

Frag. Warumb sollen wir gutte werck thun?
Antwort. Nicht darumb/ daß wir mitt vnserem thu ndie sünd büssen/ vnnd ewigs leben verdienen/ Dann Christus hat die sünd allein gebüsset/ vnd ewigs leben verdienet/ Sunder darumb/ daß wir vnseren glauben mitt den guten wercken bezeügen/ vnnd dem Herren für seine gutthaten danckbar sein sollen/ rc.

Das vierdt teil dises Catechismi. Von den Sacramenten/ vnd dem gebrauch der Schlüssel.

Frag. Was stands bistu/ liebes kind?
Antwort. Ich binn ein Christ.

Frag. Wa bey erkennet man dein Christenthumb?
Antwort. So ich Jesum Christum durch den glauben bekenne/ vnd durch den tauff inn sein gemeyn bin auffgenummen/ Im nachtmal aber Gott danck sage vmb den todt Christi/ vnd mit yederman befridet/ mitt einem rechten Christlichen leben/ auch sein wort zu einem trost mit fleiß vnd ernst gern höre.

Frag. Was ist aber der Tauff?
Antwort. Der tauff ist ein Sacrament vnd göttlich wortzeichen/ damit sich Got der Vatter durch seinen sun Jesum Christum/ sampt dem heyligen geist verspricht/ daß er dem getaufften ein gnediger Got wölle sein/ vnd jm verzeihen alle seine sünd/ vnd jn auffnemen an eines kindts statt/ vnnd erben aller himlischen güteren.

Frag. Mit welchen worten ist das Sacrament des tauffs von Jesu Christo ingesetzt?
Antwort. Matthei am letsten/ da der Herr zu seinen Jüngern sprach/ Gond hin vnnd lernet alle völcker/ vnd tauffent sie in dem nammen des vatters/ vnd des suns/ vnd des heyligen geistes/ vnd lerent sie alles waß ich euch befolhen hab. Des glychen Marci am letsten/ Gond hin in alle welt/ vnnd predigen das Euangelium allen Creaturen/ wer glaubt vnnd taufft virdt/ der wirdt sälig werden/ wer aber nitt glaubt/ wirt verdampt werden.

Frag. Was ist das Nachtmal vnsers Herren Jesu Christi?
Antwort. Es ist ein Sacrament/ vnnd ein göttlich wortzeichen/ darin Christus mitt dem brot vnd wein der dancksagung denn Gläubigen/ sein leib vnd blutt/ warhafftiglichen darreicht/ vnd vergwisset sie darmit/ daß sie habend verzeihung der sünden/ vnnd das ewig leben.

Frag. Wie lautend die wort der insatzung des Nachtmals Christi?
Antwort. Inn der nacht da der HERR verraten ward/ vnnd mit seinen jüngeren zu tisch sasse/ namme er das brot in sein heylige hendt/ sagt danck seinem Hymlischen Vatter/ segnets/ brachs/ gab es seinen Jüngeren/ vnd sprach/ Nement hin vnd essent/ das ist mein leib/ der für eüch hingeben wirdt/ solchs thut zu meiner gedechtnuß/ Des selbigen gleichen nach dem abentmal nam er den kelch/ sagt danck vnd sprach/ Nement hin vnnd trincken alle darauß/ Dz ist der kelch des neüwen Testaments in mynem blut/ das für euch vnnd für vil vergossen wirt/ zur vergebung der sünden/ Sollichs thut/ so offt jr das thund/ zu miner gedechtnuß.

Frag. Welches seind die schlüssel zum himmelrich?
Antwort. Die predig des heyligen Euangelions von Jesu Christo.

Frag. Wa ist das Predigampt von Jesu Christo eingesetzt?
Antwort. Luce am zehenden Capitel/ Wer eüch höret/ der höret mich/ wer eüch verschmächt/ der verschmächt mich. Matthei am sechtzehenden/ Ich will dir die schlüssel des himmelreichs geben/ alles waß du auff erden binden wirst/ sol auch im himmel gebunden sein/ vnd alles was du auff erden lösen wirst/ soll auch im himmel loß sein. Johannis am zweintzigsten capitel/ Nemend hin den heyligen geist/ welchen jr die sünd verzeihen/ denen seind sie verzygen/ vnd welchen jr die sünd behalten/ denen seind sie behalten/ rc.

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/e/erb/erb_catechismus.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain