Dieterich, Veit - Summaria christlicher Leer - Am vier vnd zwentzigsten Sontag/ wie vnser lieber Herr/ des Obersten Dochter vom todt auffwecket/ vnnd vnter wegens dem krancken Weyblein holfft/ Matthei am 9.
DAs Weyblin sprach bey ihr selb: Möchte ich nur sein kleyd anrüren/ so würde ich gesundt/ Da wendet sich Jesus umb/ vnd sahe sie/ vnd sprach: Sey getöst mein Dochter/ dein glaub hat dir geholffen/ Vnd das Weyb war gesundt/ zur selben stundt.
Alß Jesus in des Obersten hauß kam/ vnd sahe/ die Pfeyffer vnd das getummel des volcks/ sprach er zu jnen: Weyhcet/ denn das Medlin ist nicht todt/ sonder es schlefft.
DAS sindt zwo treffenliche Histori/ in der ersten sehen wir/ wie ein so gewaltiges mechtigs ding es vmb den glauben sey/ wo man alles gutes sich zum Herrn Christo versihet/ vnd auff sein hilff hoffet. Denn da disem weyblin zwölff gantze Jar/ kein Artzt noch ärtzney kondte helffen/ wirdt sie yetzund in eim augenblick gesund/ da sie des Herren Christi kleyd anrüret. Solche krafft ist nicht im kleid Christi gestecket/ Denn andere leut haben es auch angerüret/ aber dadurch ist jnen nicht geholffen/ Allein der glaub vnd das vertrawen/ auff den Herrn Christum hat es thun/ das sie den Herren Christum dafür hielte/ er würde jhr helffen/ wenn sie nur sein kleyd köndte anrüren. Solchem Exempel sollen wir folgen/ vnd Gottes wort mit fleyß mercken/ vnnd mit gantzem hertzen drran hangen/ was es vns durch Christum zusaget/ das es gewiß muß geschehen/ es scheyne gleych so vnmüglich für der vernunfft alß es ymmer könne.
Die ander Histori/ vom verstorbnen Meydlin ist auch tröstlich. Denn Christus gehet nicht anders mit jhm vmb/ denn alß schlieffe es/ Er nimbts bey der hand/ wie man ein schlaffendes mensch auffmundert/ bald stehet das Meydlin auf/ vnd lebet. Derhalb sollen wir den todt ansehen/ nicht wie er gegen vns ist/ Denn wir sind jm zu schwach/ er tödet vns alle/ sonder wie er gegen dem Herren Christo ist/ da ist er nicht ein todt/ sonder ein schlaff/ Vnd ist gewiß/ alle so an Christum glauben/ sterben nicht/ sonder entschlaffen/ Vnd ist dem Herrn Christo nur vmb ein wort zu thun am Jüngsten tag/ so werden sie auß dem schlaff auffwachen zum ewigen leben.
Gebet
ALlmechtiger ewiger Gott/ der du durch deinen Son/ vergebung der sünden/ vnd rettung wider den ewigen todt/ vns hast zugesaget/ Wir bitten dich/ stercke vns durch deinen heyligen Geyst/ das wir inn solchem vertrawen auf dein gnad durch Christum/ teglich zunemen/ vnnd die hoffnung fest vnd gewiß behalten/ das wir nicht sterben/ sonder sanfft entschlaffen/ vnnd durch deinen Son Christum Jesum am Jüngsten tag/ zum ewigen leben wider sollen aufferwecket werden/ AMEN.