Dieterich, Veit - Wie die Eltern jhre kindlin zu disen fehrlichen zeyten/ vmb erhaltung des wort Gotes/ wider die feinde des heyligen Euangelij sollen lernen betten.
HErr Got himlischer Vater/ wir dancken dir/ dz du vns das selige liecht deines wortes so gnediglich angezündet/ vnd bißher hast lassen leuchten/ vnd bitten dich/ Du wöllest ja zu diser zeyt ob solchem liecht gnediglich halten/ vnd den Sathan vnd der argen welt nit gestatten/ das sie es außleschen. Laß dich vnser erbarmen lieber Vater/ vber welche solcher jammer sonderlich würde außgehen. Wir sind noch jung vnd vnerzogen/ vnd bedürffen für vnd für/ das wir in deiner forcht/ vnd in deim wort von vnsern eltern vnterrichtet werden/ vnnd dich von tag zu tage/ ye lenger ye baß erkennen lernen/ So gehn aber die feinde deines worts da mit vmb/ das sie vns in abgötterey vnd finsternuß füren/ vnd das wort vns gar entziehen wöllen/ Solchem jammer lieber Vater/ wehre du vmb deines namens willen. Du sprichts/ du wöllest dein lob zu zurichten auß dem munde der vnmündigen vnd seugling/ Vmb solche gnad bitten wir dich yetz/ lieber vater/ gibe deiner Kirchen fride/ vnnd wehre allen feinden deines worts/ die jetzund vns bedrangen/ auff das wir vnd vnsere brüderlin vnd schwesterlin/ so teglich hernach wachsen/ solches gnediges liecht auch haben/ vnnd dich mit vnserm gebet frü vnd abens loben/ anruffen/ vnnd bekennen/ Der du vnser einiger Gott vnd ewiger trost bist mit deinem Son vnserm Herrn Christo Jesu/ vnd dem heiligen Geist/ Amen.