Der Christlichen Kirchen Gebet in disser grossen not die sie betroffen hat/ geschrieben durch Johannem Brentz/ Verteutscht durch Erasmum Alberum D.
ALmechtiger/ ewiger/ gütiger Gott/ der du dich dem menschlichen gschlecht offenbart hast/ nicht allein durch der Welt schepffung/ vnd erlösung der kinder Israel aus Egypten/ sonder auch (welchs die allergröste wolthat ist) durch deines eyngebornen Sones Gepurt/ predigte vnd wudnerthaten. Wir bitten dich vmb desselben deines lieben Sones willn/ du wöllest vnser Klage in disser grossen not gnediglich hören/ vnd ansehen das der böse Feind nicht allein vns/ sonder viel mehr die ehre deines Namens antastet vnd schendet.
Ah Herr Gott/ wir arme leute waren durch die erbsünde gar verdirbt/ vnd hatten verloren die Gerechtigkeit damit Adam geschaffen war/ vnd kundten dieselbige vff keynerley weise widder erlangen/ musten deßhalben ewiglich verdampt sein.
Du hast dich aber lieber Vatter vnsers grossen hertzenleids alsobald erbarmet vnd vns Christum verheyssen vnd gegeben/ der hat durch seinen Gehorsam vnser4n vngehorsam gebüsset/ vnd vns seine Gerechtigkeit geschencket/ damith wir für deinem Gericht bestehn können/ hat auch vnsere hertzen mit dem heyligen Geyst erleucht/ das wir Jesum Christum für vnsern Heyland erkant vnd angenummen haben.
Dis ist die rechte ware Götliche lere/ die du Adam vnd den ertzuettern offenbaret hast. Also haben die Propheten geleret: Also hat dein eingeborner Sone selbst geprediget/ vnd sölche lere haben die Apostelln von ihm empfangen/ vnd in der gantzen welt verkündiget.
Disse lere hastu vns auch recht/ kurtz vor der Welt ende/ nach deiner grossen barmhertzigkeit/ durch deinen trewen Propheten D. Martinum widderumb offenbaret/ vnd vns aus den schrecklichen finsternissen Römischer grewel gefürt.
Wie sich aber die Welt gegen disser heylsamen lere erzeyge/ das sihestu himmelischer Vater. Denn wir breyten aus für deiner Götlichen Maiestat/ wie Hiskia/ die lesterbrieffe Bepstlicher Bullen/ smapt seinen vermaledeiten Bannbrieffen/ der Gotlosen Fursten blutdürstige mandata/ vnd der Sophisten lesterbücher/ damit sie disse heylsame lere deines Euangelii/ als ketzerisch vnd vffrhurisch verdammen.
Vnd wiewol vnsere Fürsten vnd Herrn/ so deinem Sone Jhesu Christo/ als dem Könige der ehren/ die thore vffgethan/ ihren vnd deinen Feinden viel vnd grosse ehrbietung vnnd vnterthenige dienste erzeygt/ vnd sie offt mit aller demut vmb friede gebeten/ vnd sie auch gern vff den rechten Weg zum ewigen leben bracht hetten/ so haben sie vns doch keyner wolthaten/ bitte noch vermanung geniessen lassen/ sonder dein WORT von sich gestossen vnd ie lenger ie boßhafftiger/ mutwilliger/ stöltzer vnd trötziger worden/ haben der vnsern viel veriagt/ beraubt/ erwürget/ vnd mordbrenner widder vns außgesendet/ auch zuletzt durch disse schreckliche empörung vns verrheterlich vberfalln/ vnsere Weibe vnd Kinder geschendt/ vnd andere vnsagliche schande vnter vns begangen/ vnd trachten noch treglich/ wie sie dich himmilischen Vatter deinen eingebornen Sohn vnd heyligen Geyst sampt dem Euangelio vnd vns/ gründlich außrotten/ vnd ire Abgötterei vnd schendlich leben erhalten mögen.
Wirstu dir dann/ lieber Herr Gott ihr sölch fürnehmen/ lestern/ wüten vnd toben lassen wolgefallen? wirstu ihnen beistehn vnd helffen? Nein. Das wirstu lieber Vatter mit nichte thun/ denn du bist kein Got/ dem Gotloß wesen wolgefalle. Psal. 5.
So lasse dich doch ein mal/ gütiger Vater/ mercken/ daß du noch der rechte ware Gott seist/ denn wirstu vns itzt nalassen/ so werden die Gotlosen nicht vffhören zusagen/ wo ist nun ewer Gott? wo ist nu ewer Euangelium vnd Sacrament? wie fein hilfft euch ewer Christus.
Herr Gott/ disse hohnsprecher hörestu ia wol. Darumb stehe vff/ vnd sihe drin/ die Sache trifft nicht alleyn vns/ sonder dich viel mehr an/ die woltestu doch verteydigen.
Thue deinen lieben Son Jesum Christum aus Bepstlichem Banne vnd Keyserlicher Acht. Erhalte dein armes Volck/ welchs dein eingeborner Sone mit seinem thewern Blute erworben vnnd ihm thestiglich erwelet hat. Stercke auch den Glauben vnser Oberherrn/ die vmb deines worts willn von deinen Feinden geplaget werden/ gib ihnen bestendigkeit bei deinem wort zubeharren. Wir sind wol nicht werd/ das wir deine hehrligkeit sehen/ du bist aber werdig/ das deine hehrligkeit in aller welt gesehen vnd erkandt werd.
Herr Got du hast gesagt/ Ruffe mich an in der not/ so will ich dich erretten/ so soltu mich preisen. Erhöre vns lieber Vater/ denn du bist gut vnd gnedig/ von grosser güte allen die dich anrufen.
Wir ruffen dich an/ erhöhre vns/ vff das wir dich auch preisen mögen itzt vnd in ewigkeit/ durch Jesum Christum deinen Sohn vnsern Herrn. Amen.
Es. 6.
Got der im Himmel wohnet/ bringe vmb alle Könige vnd Völcker/ die Gotts wort endern vnd hindern.