Viererley zeugnus von Jesu Christo/ Johan. 1. Psal. 45. Esaie. 53.
VNd diß ist das gezeugnus Johannis/ da die Juden sandten von Jerusalem/ Priester vnnd Leuiten/ das sie jn fragten: Wer bistu? Vnd er bekant/ vnd leugnet nicht. Vnd er bekant: Ich bin nicht Christus. Vnd sie fragten jn: Was denn? Bist du Elias? Er sprach: Ich bins nicht. Bist du ein Prophet? Vnd er antwort: Nein. Da sprachen sie zu jm: Was bist du denn/ das wir antwort geben denen/ die vns gesandt haben/ was sagst du von dir selbs? Er sprach: Ich bin ein rüffende stimm/ in der wüsten/ Richtet den weg des Herren/ wie der Prophet Esaias gesagt hat.
Vnd die gesandt waren/ die waren von den Phariseern/ vnd fragten jn/ vnd sprachen zu jm: Warumb tauffest du dann/ so du nicht Christus bist/ noch Elias/ noch ein Prophet? Johannes antwort jhnen/ vnnd sprach: Ich tauffe mit wasser/ aber er ist mitten vnter euch getretten/ den jr nicht kennet/ der ists/ der nach mir kommen wirt/ welcher vor mir gewesen ist/ des ich nicht werd bin/ das ich seine schuchriemen aufflöse. Diß geschahe zu Beth Araba jhenseyt des Jordans/ da Johannes tauffet.
Waruon lautet diß Euangelion?
VON dem herrlichen vnnd tröstlichen zeugnus Sanct Johannis des Tauffers/ von welchem Esaias 40. vnd Malachias 3. zuuor geweyssaget/ Vnd das Sanct Johannes der Euangelist so hoch rhümet/ welches vns die Christenheyt jerlich erinnert neben der bekentnus Sanct Thome/ Stephani vnnd Sanct Johannis des Euangelisten/ auff das wir auß diesem auußschuß der Aposteln/ Euangelisten/ Mertterer vnnd Propheten/ vnnd auß jrem einhelligen zeugnus/ das newgeboren Kindlein recht erkennen lernen.
Was zeugen die theuren Heyligen Gottes/ von Jesu Christo?
Sanct Thomas bekennet ihn für seinen Gott vnd Herrn/ vnd wirdt selig weyl er an jn glaubet/ Johan. 20.
Sanct Stephan zeuget mit seinem munde vnd blute/ das diß kindlein der grosse Prophet ist/ Welchen Gott Deutero. am 18. durch Mosen verheissen hat/ vnd das er Gottes wort in seinem munde füre/ vnnd vns den rath vnd willen Gottes erklere/ Psalmo 2. Vnd sihet jhn stehen zu der rechten des Vatters/ vnd ruffet jn an/ vnd befilcht jm seinen Geyst/ Acto. 7.
Sanct Johannes der Euangelist zeuget auß Mose/ das Christus das ewige wort/ vnnd eingeborner warer Son Gottes ist/ der von ewigkeyt bey dem Vatter gewesen/ durch welchen alles geschaffen und außgericht/ vnd das leben dem verlornen menschlichen geschlecht widerbracht ist/ vnd wir kinder vnnd erben Gottes werden/ wenn wir glauben an seinen namen vnd Euangelion.
Sanct Johannes der Tauffer zeuget auß sonderlicher offenbarung Gottes/ das Christus für ihm gewesen sey/ vnd das auß Christi fülle/ alle menschen gnade vmb gnade nemen/ vnnd das er sey das Lamb Gottes/ welches vnser sünde treget.
Erklere mir das zeugnus Johannis.
Sanct Johannes deutet das priesterthumb vnd opffer des alten Testaments auff Jesum Christum/ vnd zeuget vnd bekennet/ das Christus jn weit vbertreffe/ vnd ein höher wesen/ ampt vnd beruff habe/ denn er vnd alle andere menschen. Denn der vom Himel kombt ist vber alle/ Johannis am 3. Dieweyl der eingeborne Son Gottes ist/ vnd ein heiliger mensch one sünde von einer reinen Junckfrawen auß Königlichem stamme/ durch den heiligen Geyst geboren/ vnnd ist von Gott gesetzet vnd verordnet zu einem ewigen Priester vnd mittler/ Psalm. 110. das er der rechte Aaron sey/ den Gott selbs mit seinem öle vnd Geyst gesalbet/ vnd versigelt/ Psalm. 45. vnt mit der Königlichen krone/ vnnd priesterlichem vnd heyligem schmucke/ Psal. 8. vnd mit ehre/ preyß vnd ewiger herrligkeit gezieret 2. Petri 1. Vnd zu einem lerer vnd Bischof vnser seelen geweihet vnd eingeweyset/ Psalm. 2. Vnd seine hende gefüllet/ vnd jm alles vntergeben vnd eingereumet hat/ Darmit wir alle auß seiner fülle vnd reichthumb seiner gnaden/ vnd himlischen schetzen/ gnade segen vnd allerley güter vnd gaben empfiengen/ Psalm. 68. Vnd des heyligen Balsams vnnd salbung/ so von dem haubte Christo auff seine glidmaß tröpfelt/ theylhafftig wurden/ Psalm. 133. Vber das alles/ so hat ihn Gott zum Lamb Gottes gemacht/ vnnd ihm alle vnsere schuld vnnd sünde auffgeleget/ das er durch sich selber/ vnd sein eigen thewer blut vnd todt/ das rechte schuld vnnd sündeopffer würde/ Esaie 53. 2. Corinth. 5. Vnd das krefftige lösegeldt vnnd ranzon/ Matth. 20. vnnd versünung vnd gnugthuung 1. Johan. 2. welches Gottes zorn stillete/ vnnd vnsere sünde truge bezalete vnnd wegneme/ vnd erarnete vnd erwürbe vns durch sein einiges vnnd volkommens opffer (Hebre. 10.) vergebung aller vnser angeborner vnd wircklicher sünde/ sampt einer newen gerechtigkeyt/ heyligem Geyste/ vnd dem ewigen leben/ Psalm. 22. Wenn wir glauben vnd vertrawen an seinen namen/ vnd ruffen jn an auß gutem gewissen.
Warzu dienen vns dise zeugnuß?
Das wir Gott den Vater/ vnd den er gesandt hat JEsum/ für den rechten Christ vnd Messiam/ vnd vnsern Priester vnd König lernen erkennen/ Johan. 17. vnnd seinem namen trawen/ vnnd den in allen nöten anruffen/ damit wir durch ihn das ewige leben haben/ Vnd auff jm/ als auff der rechten leyter Jacobs/ inn den auffgeschlossen Hymel kommen können/ Johannis 1. Genesis 28.
Vnd das wir vns vor allen andern falschen Christen vnd gesalbeten hüten/ die vns auff ander mitler vnd vorbitter/ oder auff andere priester vnd versüner/ oder auff andere opffer vnd bezalung für vnsere sünde/ weysen vnnd leyten wöllen. Denn es ist kein ander name/ opffer vnd werck/ dadurch wir können selig werden/ denn das thewre blut Jesu Christi/ ein mal am Creutz auffgeopffert/ für der gantzen Welt sünde/ Actorum am 4.