Ich glaube an Jesum Christum den Herrn Zebaoth/ vnd vnsern Felthaubtman.
Da ward Jesus vom Geist in die wüsten gefürt/ auff das er vom Teuffel versucht würde. Vnd da er viertzig tag/ vnnd viertzig nacht gefastet hette/ hungert jn. Vnd der versucher trat zu jm/ vnd sprach: Bist du Gottes son/ so sprich/ das diese steine brod werden. Vnd er antwortet/ vnd sprach: Es stehet geschrieben: Der mensch lebet nicht vom brodt allein/ Sondern von einem jeglichen wort/ das durch den mund Gottes gehet.
Da füret jn der Teuffel mit sich/ in die heylige Stat/ vnd stellet jn auff die Zinnen des Tempels/ vnnd sprach zu jm: Bist du Gottes Son/ so laß dich hinab. Denn es stehet geschriben/ Er wirdt seinen Engeln vber dir befelh thun/ vnd sie werden dich auff den henden tragen/ auff das du deinen fuß nit an einen stein stossest. Da sprach Jesus zu ihm: Widerumb stehet auch geschriben: Du solt Gott deinen Herren nicht versuchen.
Widerumb füret jn der Teuffel mit sich auff einen sehr hohen Berg/ vnnd zeyget jm alle Reich der welt/ vnd jre herrligkeyt/ Vnd sprach zu jm: Das alles wil ich dir geben/ so du niderfellest/ vnd mich anbetest. Da sprach Jesus zu ihm: Hebe dich weg von mir Sathan/ Denn es stehet geschrieben: Du solt anbeten Gott deinen Herrn/ vnd jhm allein dienen. Da verließ ihn der Teuffel. Vnd sihe/ da tratten die Engel zu jm/ vnd dieneten jm.
Waruon lautet diß Euangelion?
DEr Herr Jesus hat viertzig tag vnd nacht gefastet/ wie Moses vnd Elias/ damit er für vns die rechte verson fasten hielte/ vnd ist in der wüsteney/ Wie der rechte versön Bock/ Leuitici am 16. vnter den wilden thieren vom bösen geyst versucht/ vnnd sehr kranck gewesen/ damit er den schatten des gesetzes erfüllet/ vnd den Teuffel vberwinde/ vnd all vnser elende versuchte/ als ein trewer Bischoff/ Hebr. 5. vnd vns seinen sieg schenckete/ vnd lehrete vns/ wie wir vns vor dem Teuffel auff halten solten.
Wie versucht der böse Geyst den Herrn Christum?
Erstlich wil er Christum von seinem weg vnd beruff treiben/ mit hunger/ kummer/ not/ armut/ vndanck vnd vngedult. Darnach raumet er jm ein/ das er Gott versuche/ Actor. 15. vnnd etwas newes/ one vnnd wider Gottes wort auß vermessenheyt vnd eytler ehre fürneme/ vnd das er sich one noth vnd klarem befelh Gottes/ in gefahr vnnd frembde wege begebe/ vnnd verachte die mittel/ so Gott geordnet/ damit er einen grossen namen vnd rhum vnter den leuten erjage.
Letzlich verkleydet sich der Sathan in Engels vnnd Gottes gestalt/ vnd beutet dem Herrn Jesu/ gelt/ gut/ vnd der welt reich vnd herrligkeyt an/ das er vom rechten Goottesdienste/ vnd anruffung des eynigen Gottes abfalle/ den Teuffel vnd sein abgötterey anbette.
Wie widerstehet vnd vberwindet der Herr Christus den Teuffel?
Er leidet seinen hunger vnd armut mit grosser gedult/ vnd helt sich steiff an das wort Gottes/ vnd wil seinen beruff nit faren lassen/ vnd auff frembde wege tretten/ oder etwas newes anheben vber den befelh den er einmal von Gott bekommen/ Joh. 14. vnd lest jm an seines himlischen vaters ehre vnd gunst genügen/ vnd liebet vnd ehret seinen vatter vber alle gaben vnd creaturn/ vnd dienet vnd ruffet jn an bestendig nach dem wort Gottes/ in welchem vns Gott seinen willen/ vnnd die rechten Gottesdienst offenbaret hat/ vnnd weyset den Teuffel mit gewalt in krafft des worts Gottes abe.
Was sollen wir hierauß lernen?
Das zwischen dem Herrn Christo vnd der schlange/ eine ewige feindschafft ist/ Genesis 3. Vnnd das dise zwen Helden mit jren heerscharen stetgs zu feld wider einander ligen/ Psalm 68. Der Sathan wil dem Herren Christo seine ehre/ erbtheil vnd braut entfüren/ Wie ihm die schantze auff eine zeyt mit der Eua geriete/ darumb sticht er christum in die ferschen/ vnd richtet sich mit morden vnd liegen an die Christenheyt/ das er sie entweder mit armut/ elend/ creutz vnd leyden/ als ein schwarzer Teuffel/ vnd gewaltiger Fürst dieser Welt/ oder mit heyligem schein/ eyteler ehre vnd vorwitz/ als ein schöner Engel des liechtes/ oder mit lust/ ehre/ pracht dises lebens/ wie ein gekrönter vnd göttlicher Teuffel/ 2. Corin. 4. von Christo/ seinem wort/ vnd auß der rechten ban/ vnd waren Gottesdiensten wegreisse.
Der Herre Jesus aber streytet für seine braut/ wie ein hirsch auff seiner pfaltz/ vnnd zustöret dem feinde seine macht/ durch das schwache wort der seuglingen/Psalm. 8. Vnd das sehnlich seufftzen seiner Christenheit/ vnd nimpt jm sein harnisch vnd wehr/ Luc. 11. Wie der Hirt Dauid den Goliath zu tode schleudert vnd bettet/ vnd errettet den rechten zeug vnd heer Gottes/ von des Teuffels lesterung/ vnnd schencket vns seinen sieg/ 1. Corinth. 15. vnd lehret vns wie wir den Teuffel auch vberwinden vnd verjagen können.
Wie sollen wir vns wider den Teuffel rüsten?
Wir sollen in vnserm beruff/ vnnd auff vnserm wege bleiben/ vnd vns fest an das wort halten/ vnnd alles weltlichen prachts willig verzeyhen/ vnd nit vergessen/ das wir in der heiligen Taufe/ dem Teuffel vnd seinem wesen abgesaget/ vnd jn vnd alle seine helfers helffer auff vns geladen haben/ vnd sollen als Ritter vnd geistliche Kriegßleut/ für allen dingen feste behalten den schilt des glaubens/ vnnd den helm des heyls/ vnd den krebs der gerechtigkeyt Christi/ damit wir in der heiligen Tauf angethan vnnd verwaret sein/ da wir Christum angezogen haben/ Roma. 13. Vnd nachmals vns mit dem Euangelio stiffeln vnnd verwaren/ wenn wir auff die schlange tretten sollen / Luc. 10. vnd das schwert des geistes/ welches ist das wort Gottes/ vnd Dauidis schleuder stein/ welches ist die ware anruffung/ gebrauchen/ vnd stetigs in guter bereitschafft sitzen/ wachen/ sorgen/ vnd nüchtern sein/ vnd getrost vnd freidig in dem lager Jesu Christi verharren/ damit der Teuffel nicht heimllich in vns breche/ vnd vns vnuersehens vberfalle/ Wie denn S. Paulus beyde der feinde macht/ vnd der Christen rüstung/ Eohes. 6. vns zur warnung anzeyget.