GLeich wie mich mein Vatter gesendet hat/ so sende ich euch. Nemet hin den heiligen Geyst/ welchen jr die sünde erlasset/ den sind sie erlassen/ vnd welchen jr sie behaltet/ den sind sie behalten.
DAs ist ein kurtze ler/ aber da trefflich vil an gelegen ist/ NEmlich/ das wir zur vergebung der sünden/ durch vnsere werck/ vnd verdienst nit können kommen. Allein im wort Gottes finden wirs/ Das selb wirt vns nit allein in der predigt/ sonder auch in der heiligen Tauf/ vnd dem abendmal verkündet/ vnd fehlet ferner nichts/ denn das du solchem wort/ vnd zusagung Gotes glaubest. In der tauff sagt man dir/ wer glaubt vnd getaufft wirt/ der wirt selig werden/ Im Abendmal sagt man dir/ der leyb Christi sey für dich geben/ vnd sein lbut zu vergebung deiner sünden vergossen/ So sagt das Euangelion allenthalb/ Durch Christum sollen vns vnser sünd vergeben werden. Wer nun solcher zusagung glaubt/ der hat vergebung all seiner sünde/ Wer aber nit glaubt/ dem sol weder tauf noch Sacrament/ noch wort helffen/ seine sünde sind jm in ewigkeyt behalten/ vnd muß verdampt werden/ er fange an/ vnd thu sonst was er wölle/ Also lösen vnd binden die schlüsssel/ das ist/ das heilig Euangelion vnd predigampt/ welches alß denn anfangen vnd in schwang hat gehn sollen/ da Christus von todten aufferstanden/ für die sünde mit seim tod bezalet/ vnd den Satan vberwunden hat. Für solche frucht der aufferstehung Christi/ das vergebung der sünde in seinem namen gepredigt wirdt/ sollen wir Got teglich dancken.
HErr Got himlischer Vatter/ wir dancken dir für deine grosse vnaußsprechliche gnad/ das du durch deinen Son vnsern lieben Herrn Christum/ das heylige Euangelionn/ vnd die heyligen Sacrament verordnet hast/ vns zum trost das wir vergebung der sünden da sollen finden/ Wir bitten dich/ gib deinen heyligen Geyst in vnsere hertzen/ auff das wir deim wort von hertzen glauben/ vnd durch die heyligen Sacrament von tag zu tag den glauben stercken/ biß wir endtlich selig werden/ Durch JEsum Christum deinen Son/ vnd vnsern Herren/ Amen.