Christus sprach zu seinen Jüngeren: Solches hab ich zu euch geredt/ das jr euch nit ergert/ Sie werden euch in den Bann thun/ es kombt aber die zeyt/ das/ wer euch tödtet/ wird meinen/ er thue Gott einen dienst dran. Vnd solches werden sie euch darumb thun/ das sie weder meinen Vatter/ noch mich erkennen.
DIß ist ein weyssagung/ wie die Christen vmb des wortes willen/ auff der welt müssen verfolgetwerden. Weil es aber für der vernunfft scheynet/ alß sey Gott denen feind/ die also vnter dem Creutz ligen/ vnd sich leyden müssen/ zeyget der Herr die vrsach an/ wo solche verfolgung vnd haß wider die Christen herkomme/ vnnd spricht: Es geschicht nit darumb/ das euch Gott feynd sey/ oder nichts guttes gönne/ Sonder das die welt weder meinen vatter/ noch mich kennet. Diß vrtheyl sollen wir fleyssig mercken/ Denn ye vnd ye haben dise/ die Christen am hefftigsten verfolget/ so für der welt für fromm vnd heylig geachtet sind. Zu Jerusalem waren es die Phariseer vnnd Schrifftgelerten vnd Hohenpriester/ Heitgs tages ist es Bapst/ die Bischoffe/ Münche vnd Pfaffen/ die sich rhümen/ sie sind allein die rechte Kirch. Aber gewiß ist es/ sie kennen weder Christum noch seinen Vatter/ sonst würden sie sein wort nicht verfolgen. Darumb erger sich niemandt an dem grossen scheyn vnd herrlichen namen/ den die verfolger des worts bey der welt haben. Widerumb beschwere sich auch nyemandt des leydens vnnd der verfolgung/ sintemal wir den schatz haben/ vnd den ewigen Vatter vnnd seinen Son Christum Jesum recht kennen/ Solches erkentnuß bringt vns ye den höchsten trost/ das wir an Gottes hilff vnd gnad nit können zweyfflen/ vnd macht vns endlich gar selig.
HERR Gott himlischer Vatter/ wir dancken dir das du vns durch deinen heyligen Geyst zu zeugen deines Sones/ vnsers lieben Herren Christi gesetzet hast/ Vnd bitten dich/ weyl die welt solches zeucknuß nicht kan dulden/ vnd vns drüber zusetzet/ du wöllest vns mut vnd trost verleyhen/ das wir am Creutz vns nicht ergern/ sondern bey deinem zeucknuß fest bleyben/ vnd für vnd für bey dem hauffen gefunden werden/ der dich vnd deinen Son kennet/ biß wir endlich gar selig werden/ durch Jhesum Christum deinen Son/ vnd vnsern Herren/ Amen.