Dieterich, Veit - Summaria christlicher Leer - An Sanct Steffans tag/ in den geschichten/ wie er vmb des Herrn Christi willen/ von Juden ist gesteyniget worden/ Acto. 7.
DIe Juden steynigeten Steffanum/ Er aber betet vnd sprach: Herr Jesu/ nimm meinen Geyst auff/ er knyet aber nider/ vnnd schrey laut/ Herr behalt jn dise sünde nicht/ vnd alß er das gesagt/ entschlieff er.
WIR haben inn ettlichen Predigten nacheinander gehört/ vom ampt vnsers Herren Christi, vnnd wie wir sein sollen geniessen/ NEmlich/ das wir durch jn vergebung der sünden/ den heyligen Geyst/ vnd ewiges leben sollen haben. In diser Histori aber/ vom heyligen Steffano/ sehen wir ein Exempel/ wie es vns inn der welt gehen soll/ wenn wir an Christum recht glauben vnd jn bekennen/ NEmlich/ das wir vns leyden/ vnnd allerley vnglück gewarten müssen/ Denn die welt/ vnd ir Herr der Teuffel/ kan solchen glauben an Christum nicht leyden/ setzt derhalb den Christen zu/ biß er sie gar vmbbringet/ Da sollen wir vns des heyligen Steffans Exempel trösten/ vnnd dran lernen/ das wir/ wo es vns der gleychen begegnet/ alles gern leyden/ vnd yederman von hertzen vergeben sollen/ Denn das ein Christ stirbet ist nichts böses/ weyl vnsers Herren Christi wort da stehet/ vnd spricht: Wer an mich glaubet/ wirdt den todt nicht sehen ewigklich/ Vnd ob er schon stirbet/ wirdt er doch wider leben. Derhalb ist Steffanus seiner person halb wol zu friden/ er befilhet seinen Geyst dem Herren Christo/ vnd weyß das er in ewigkeyt bewaret ist/ Allein ist es ihm zuthun/ vmb die blinden verfolger/ die wolt er auch gern from vnd selig sehen/ Solchs sollen wir lernen/ vnnd in der anfechtung auch so fein gedultig sein/ glauben vnd lieben.
Gebet
HErr Gott himlischer Vatter/ der du den heiligen Steffanum seins glaubens halb leyden vnd steynigen hast lassen/ vns damit anzuzeigen das dein reich nit von diser welt sey/ sonder in ein anders leben gehöre/ Wir biten dich/ wo wir vmb deines worts vnd namens willen auch müssen leiden/ sterck vnser hertzen durch deinen heiligen geist/ das wir fest bestehn/ vnd vns mit deiner gnad/ vnd den ewigen gütern/ an stat der zeitlichen trösten mögen/ Amen.