Dieterich, Veit - Summaria christlicher Leer - Am Sontag zwischen dem Newen jar vnd Obersten/ wie Christus am Jordan von Johannes ist getauffet worden/ Matth. 3.
DA JEsus getauffet war/ steyg er bald herauff auß dem wasser/ Vnd sihe/ da thet sich der Himel auff vber jm/ vnd Johannes sahe den Geyst Gottes/ gleych als ein Taube herab faren/ vnd vber jhn kommen/ Vnd sihe ein stimm vom Himel herab sprach: Das ist mein lieber Sun/ an dem ich wolgefallen hab.
DAs vnser lieber Herr Christus/ selb sich von Johanne im Jordan lest tauffen/ solches geschicht erstlich/ das (wie er sagt) er alle gerechtigkeyt erfülle/ das ist/ das er nichts dahinden lasse/ das da gehört zu vnser gerechtigkeyt/ Denn weyl Gott durch Johannem die tauff geordnet hette/ für die armen sünder/ sie damit zu trösten/ Gott wölte ihnen gnedig sein/ kombt vnser lieber Herr Christus als ein armer sünder/ denn er war Gottes Lamb/ das der gantzen welt sünde auff sich trüge/ vnnd begerte der heyligen Tauff auch/ vnd Johannes tauffet jn auch/ vnd geschicht/ das der heylig Geyst auff den Herren Christum sitzet/ in gestalt einer Tauben/ vnnd Gott von himel herunder lest sich hören/ vnnd spricht: Das ist mein lieber Sun/ da ich hertzliche freud an hab/ Solches ist nun vnser sonderlicher trost/ weil Christus vnser sünde tregt das wir sehen/ das Gott vnser sünden halb jm nit vngnedig ist/ sonder vns durch jn zu genaden annimbt/ wenn anders wir vns in seim namen tauffen lassen/ vnd seiner zusagung glauben. Zum andern/ sollen wir lernen die Tauff hoch halten/ sintemal sie der Sun Gottes selb mit seim leyb geheyligt/ vnnd die gantze Gottheit sich da sichtigklich offenbaret hat/ als bey eim solchem werck/ da Gott nicht anders denn gnedig bey könne sein.
Gebet.
HErr Gott himlischer Vatter/ der du dich mit deim heyligen Geyst/ inn allen genaden bey der Tauffe deines lieben Suns/ der vnser aller sünde auff sich geladen/ hast offenbaret/ vnnd vns mit deiner stimm zu jm gewisen/ das wir durch ihn vergebung der sünde/ vnd alle gnad haben sollen/ Wir bitten dich/ erhalt vns in solcher zuuersicht/ vnd weil wir nach dem befelh vnd Exempel deines Suns auch getauffet sind/ Stercke vnsern glauben durch deinen heiligen Geist/ vnd hilff vns zum ewigen leben. AMEN.