Dieterich, Veit - Summaria christlicher Leer - Am dritten Sontag/ wie JEsus einen Teuffel außtreibet/ der stumm war. Luce am 11.
Vnser Herr Jesus sprach zu den vnglaubigen Juden: So ich durch Gottes finger die Teuffel außtreybe/ so kombt ye das Reych Gottes zu euch.
MIt disen worten lehret vnser lieber Herr Christus/ wie wir dises wunderwercks vns trösten/ vnd was wir drauß lernen sollen/ das er dem armen stummen menschen hilfft/ vnd jn vom Teuffel ledig macht/ Nemlich/ dz wir sollen wissen/ wie der gnedige Vater im Himel sich vnser not angenommen/ vnd hilff wider den Sathan vnd sein Tyranney/ vns durch seinen Sun genedigklich verschaffet hab/ auff dz/ wer disem Jesum Christum mit glauben annimbt/ der soll fürt an in Gottes Reych sein/ vnnd der Sathan soll jn nicht mehr/ wie zuuor/ treyben vnd zwingen. Denn durch Christum empfangen wir den heyligen Geyst/ der hilfft vns wider den bösen feind streyten vnnd siegen/ welchen vnser lieber Herr Christus/ alß der stercker/ allgereyt vberwunden/ jm seinen harnisch außgezogen/ vnd seinen Christen den raub außgetheylet hat/ das sie solcher vberwindung auch geniessen sollen. Aber gleych wie Christus vber solchem gnedigen werck sich muß lassen vrteylen vnd lestern: Also geht es sein wort noch heutigs tages in der welt/ das manß ein Teuffels lehr schillt vnd verdammet als ketzerey.
Gebet.
HErr Gott himlischer Vatter/ der du deinen Sun vnsern Herren Christum Jesum darumb hast lassen mensch werden/ das er des Teuffels Tyranney wehren/ vnd vns menschen wider den argen feind/ schützen soll/ wir dancken dir erstlich fürsolche gnedige hilff/ vnd bitten darnach du wöllest in allen anfechtungen genedig zu vns setzen/ für sicherheyt vns behütten/ vnd in deim wort vnd deiner forcht/ durch deinen heyligen Geyst genedig erhalten/ auff das wir biß ans ende für dem bösen feinde befridet bleyben/ vnd durch deinen Sun ewig selig werden/ AMEN.