Dieterich, Veit - Summaria christlicher Leer - Am fünften Sontag/ vom Feynd/ der vnkraut in den guten acker seet/ weyl die leut schlieffen/ Matthei am 13.
DAs Himelreych ist gleych einem menschen/ der guten samen auff seinen acker seet/ Da aber die leute schlieffen/ kam sein feynd/ vnd seete vnkraut zwischen den Weytzen/ vnd gieng dauon.
DIß Euangelion ist ein nötige lehr wider das gemeyne ergernuß/ das auch vnter dem heuffllein/ welchs Christen heyst/ so vil ergernuß vnnd böser buben sind. Denn die welt/ wenn sie es sihet/ kan sie anders nicht vrtheylen/ denn solcher vnrath komme auß der lehr her/ Sie gedenckt/ wenn die lehr reyn vnnd gut were/ so solten die leut wol frömmer sein/ Aber vnser lieber Herre Christus straffet solches vrtheyl/ vnnd sagt: Das wort Gottes vnnd Christliche lehr/ sey ein recht guter Same/ da anders nichts denn alles gutes könne außwachsen. Das aber in dem acker/ da diser gute same geseet ist/ vnkraut wechst/ vnnd vnter dem heufflin/ so Gottes wort reyn vnnd lautter hat/ vil böser buben sind/ solches spricht er/ ist des feyndes/ des Sathans schuld/ der lauret/ wie ein böser Bawer/ vnd wenn die leut schlaffen/ seet er vnkraut in den guten acker. Darumb soll yedermand wacker vnd mundter sein/ vnd fleyssig auff Gottes wort achtung haben/ vnnd für dem feind sich hütten. Die aber schlaffen/ vnd sich in ergernuß lassen füren/ ob wol die selben hie auff erden der straff entlauffen/ müssen sie doch am Jüngsten tag her halten/ vnnd ewiges vrtheyl darumb tragen.
Gebet.
HErr Gott himlischer Vatter/ wir dancken dir/ das du den guten Samen dein heyliges wort inn vnsere hertzen hast außgeseet/ vnd bitten dich/ du wöllest durch dein heyligen Geyst/ solchen samen in vns lassen lebendig werden/ vnd frucht bringen/ vnd für dem bösen feind vns behüten/ das der nicht vnkraut mit einsee/ Behüt für sicherheyt/ vnd erhalt in deiner forcht/ vnd hilff in aller anfechtung/ biß wir ewig selig werden/ AMEN.