Wer das Sacrament des altars, den leyb vnd das blut Christi, nemen odder empfahen wil, der soll auf diese funf fragen wissen antwordt zu geben.

Die erste frage.

Warumb nympstu das Sacrament? Antwordt, Darumb, das ich eyn miterbe byn vnd gemeynschafft habe mit Christo, mit allen lieben heyligen vnd mit allen fromen Christen, sampt yhm zu leyden vnd zu sterben.

Die Ander frage.

Was gleubstu oder was bekennestu, dz in diesem sacrament sei? Antwort. Vnter dem brodt vnd wein ist aldo der leyb vnd das blut Christi, es ist aber nicht genug, dz ichs weys, sondern ich muss auch glauben, das myr mein Herr Christus die zu eynem gewissen Sigell, zeychen vnd Testament geben hat.

Die dritte frage.

Wie lautten die wort dises Testaments, welcher der Herr Christus gebraucht hat? Antwort. Also saget der Herr zu seinen iüngern, da er yn dz brodt gabe, Nemets vnd essents, das ist mein leyb, der fur euch gegeben wirt. Vnd da er yn den kilch gabe, sprach er, Nemet hin, trinket all draus, Dis ist mein blut des newen Testaments, das da vergossen wirt fur euch vnd fur viel zu vergebung der sunden, Das thut in meinem gedechtnis.

Die Vierde frage.

Warumb nymbst du das zeychen, ist dir doch der glaub gnug? Antwort, Das zeychen neme ich darumb, das ich damit meinen glauben stercke, nicht, das ich an dem glauben zweyfele, sonder, dieweyl my got das zeichen neben dem wordt geben aus milter gnad vnd barmhertzigkeyt, wil ich dasselbige zu brauchen nit verachten.

Die funffte frage.

Wie wilt du das Sacrament gebrauchen? Antwort, Ich wils essen vnd trincken, vnd seinen wortten glauben geben, die er zu seinen iüngern redet, da er yn dis Sacrament gabe. Dise tröstliche zusage müssen wyr mit eynem gleubigen hertzen entpfahen. AMEN.

Die Evangelischen Katechismusversuche vor Luthers Enchiridion Ferdinand Cohrs. Vierter Band. Undatierbare Katechismusversuche Berlin A. Hofman & Comp. 1902