Das vnsz Gott selbs gelernet hat. Das hat Betracht ain Armer Bawr/ der weder Lesen noch Schreyben kan. gar hüpsch vnd Nutzlich/ allen Christglaübigen MEnschen zu gut/ auch ausz Brüderlicher Trew.
Item, so wir sprechen/ Vater vnser/ Bey dem söllen wir gedencken vnd Betrachten/ das er vnser aller Vatter ist. Vnd so er vnser Vatter ist/ so söllen wir gedencken/ das wir jn Vätterlich erkennen/ alsz ain Kinde ain Vatter vätterlich erkennen soll/ vnd darnach jn inn Kindtlicher Trew vnd Liebe Loben. Vnd so wir das thund/ vnd gethan haben/ so söllen wir vnnsz erfröwen inn jn/ das wir seine Kinder seyen. Vnnd darbey gedencken der älteren Brüderschafft/ darein vnnsz Gott versamlet vnnd verordnet hat/ das wir alle Brüder vnd Schwester seind. Darnach sollen wir gedencken/ das wir ainander Lieb haben. vnd so wir dasselb thund/ so sollen wir vnsz aber ain mal erfröwen inn Gott vnserm Vatter/ das wir ain sollich Kostbarlichs/ vnschätzlichs Erblandt haben zu gewarten/ von vnserm Lieben Vatter/ nach diser zeyt.
Vnd darnach sprechen wir Der du bist inn den Himlen Bey dem sollen wir gedencken/ Herr Himlischer Vatter/ wie hetten wir so ain weyten Weg zu dir/ wenn dein Götliche Gnad nit wär/ Ich bit dich aber/ verleyh mir dein Gnad/ das ich zu meinem Erbteyl vnnd Vatterlandt müg kommmen. das ist zu der ewigen Seligkait.
Darnach sprechen wir Geheyliget werd dein Nam. Bey dem sollen wir gedencken/ Dein Heyliger Nam ist bisz her nit vil bey mir Geheyliget worden/ sonder mer Vngeheyliget vnnd Vngewirdiget/ Geschmächt vnnd Geschendet/ durch mein Leichtfertigkait vnd Boszhait/ so ich deinen Hailigen NAmen so offt leichtfertigklich inn meinen sündtlichen Mund genommen hab/ mit Fluchen/ Schelten/ vnd Schweren. Vnnd darumb so Bit ich dich vmb dein Gnad/ das du mir das wollest verzeyhen / vnd mein hertz wenden zu dem/ das hynfür dein Hailiger Nam durch mich Gehailiget werd/ vnd durch all Christen Menschen/ vnd das sie Anruffen deinen Hailigen Namen/ zuüberkommen alles/ das vnsz not ist/ von deinem Hymelischen Vatter/ Alsz du vnsz dann verheyssen hast im Euangelio/ da du sprachest/ Fürwar sag ich eüch/ was jr Bittent meinen Hymelischen Vatter/ inn meinem Namen/ das wirt er eüch geben/ Darumb das dein Hailiger Nam gnugsam Gehailiget werd durch die gantzen Welt.
Darnach/ so wir sprechen zukum vnnsz dein Reich. Bey dem sollen wir gedencken/ Herr, Hymlischer Vatter/ lasz mich nit zulang inn disem Ellenden Jamertal/ sonder/ das mir dein Reich zukum/ dein Göttliche Weyszhait bey vnnsz won/ das sie mein Seel werhaft mach inn Tugenden/ vnd das du mit deiner Göttlichen Liebe verschwendest alle ding/ die nicht deiner Hailihkait gebüren mügen. Vnd Bestätige an vnsz ein Lieb/ das wir jr nymmermeer Beraubtwerden/ vnd der Grund bey vnsz bleyb/ so kumpt vnsz dein Reich.
Darnach so wir sprechen Dein Will gescheh inn Hymel vnnd auff Erd. Bey dem sollen wir gedencken/ Herr/ Hymlischer Vatter/ mein Will soll nichts sein/ wann mein Gewissen waiszt nymmer nit was Gut ist/ du aber waist zu aller zeyt/ was das aller best ist/ Darum will ich meinen Willen gleichförmig machen deinem Göttlichen Willen. Dein Götlicher will/ werd zu aller zeyt an mir volbracht.
Darnach sollen wir sprechen Herr/ gib vnsz heüt vnser Täglich Brodt. Bey dem sollen wir gedencken/ Herr/ Hymlischer Vatter/ ich Bit dich/ nit allain vmb das zeytlich oder Leiplich Täglich Brodt/ wann du hast gesprochen im Euangelio/ Jr solt nit sorgfeltig sein was jr werdend essen oder trincken/ Hat eüch Gott der Herr geben die Seel/ die da meer ist dann der Leib oder Essen vnnd Trincken/ fürwar er wirt eüch das minder auch geben. wann er waiszt/ das jr sein notdürfftig seind. Herr/ Hymlischer Vatter/ so du dann waist/ das ich dasselb noturfftig bin/ vnd wilt mir dasselb geben/ so will ich dich vmb dasselb nit alleyn Bitten/ sonder ich wilsz befehlen deinem Göttlichen willen. Herr Hymlischer Vatter/ ich Bit dich aber vmd das Gaistlich täglich Brot/ das du vnsz hast angezaigt im Euangelio/ da du sprachest/ Der Mensch Lebt nit allein desz Natürlichen Brosts/ sonder ains jegklichen worts/ das da geet ausz dem Mund Gottes. Herr/ Hymlischer Vatter/ so ich dann hör/ das mein Arme Seel derselben wort musz geleben/ vnd von demselben Wort/ Gespeyszt werden/ so Bitt ich dich/ Hymlischer Vatter/ verleyh vnnsz (Priester vnd Prediger) die dein Göttliches wort auszsprechen/ nach deinem Göttlichen Willen vnd wolgefallen/ vnnd nach dem Hail vnserer Seel/ das es inn vnsz wachsz/ vnd Hundertfeltig Frucht bring/ vnd das wir dieselben mügen behalten/ vnnd vnser Leben richten nach deinem Göttlichen Willen vnd wolgefallen/ vnnd das wir dadurch vmb dich bekommen eyn Sicheren vnd Seligen eingang zu dir jnn das ewig Reich der Hymel.
Darzu sollen wir sprechen Vergib vnnsz vnser Schuld/ alsz wir vergeben vnsern Schuldigern. Bey dem sollen wir gedencken/ Herr/ Hymlischer Vatter/ verleyh mir dein Göttliche Gnad/ das ich meinem Nächsten Christen Menschen müg verzeyhen vnnd vergeben/ von grundt meines Hertzen/ on alle Betrieglichait/ oder ösem Mittel meines Neydigen Hertzen/ das mir dann nit müglich ist zuthun/ on dein Hilff vnnd Gnad, wann du hast gesprochen im Euangelio/ Ir sollendt Verzeyhen vnnd Vergeben/ darmit das eüch auch Verzygen werd. So ich dann hör/ das mir sunst anderst nit Verzigen mag werden/ ich Verzeyh denn meinem Nächsten auch/ So Bit ich dich Herr Hymlischer Vatter/ erlösz mein Hertz von dem schädlichen vnd verdampten Band desz Neiyds/ das er mich nit Beraub meines Vätterlichen Erbteyl/ sonder das mir dasselb zugefügt werd/ durch dein Verheyssung/ die du vnsz gethan hast/ so wir vnseren Veinden Verzeyhen/ soll vnsz auch verzygen vnd vergeben werden.
Darnach so sprechen wir Nit für vnsz ein inn Versuchung. Bey dem sollen wir gedencken/ Herr/ Hymelischer Vatter/ es leydt nit daran/ ob wir schon Versucht werden/ wann du bist selber auch Versucht worden/ aber ffür vnnsz nur nit ein inn Versuchung/ die vnnsz Schädlich vnnd Verdamlich sein müg vnserer Seel/ sonder das sie vnsz verdiensltich seyn werd zu dem Ewigen Leben.
Darnach so sprechen wir Sonder erlösz vnsz von allem übel. Bey dem sollen wir gedencken/ Herr Hymlischer Vatter/ erlösz mich von der Amfechtung desz Fleyschs vnd desz Bösen Gests/ vnd der Anfechtung diser Welt/ vnnd auch von den Teüffelischen vnd Vngöttlichen Reychtumben/ die meiner Seel schädlich seind. Herr Hymlischer Vatter/ vor disen/ vnd allen meinen Veinden vnd Widersächer/ das sie dann täglich mir mir seind Streytten/ vnnd mich begeren zu berauben meines Vatterlandesz/ Ich bit dich Herr Himlischer Vatter/ hastu mich gesetzt inn dein Gnaden/ so behalt mich dann ewigklich vor meinen Feinden/ vnd für mein Arme Seel durch dein Gelaydt/ das ist durch dein Gnad vnd Barmhertzigkait/ zu den ewigen Freüden/ dich ewigklich zu loben vnd Eren/ vnd dir Dancksagen mitsampt allen Auszerwelten/ AMEN.